Sa tumong nga makaakomodar og daghang kliyente ug mas lapad nga espasyo, opisyal nang giablihan ang bag-ong opisina sa SSS Panabo Branch nga nahimutang sa National Highway, Brgy. San Francisco, Panabo City, niadtong Oktubre 28, 2024. Ang kalihokan gisaksihan sa mga opisyales sa SSS, lokal nga panggamhanan, ug uban pang mga dinapit nga opisyal ug mga kliyente nga nagdahom nga makahatag og mas maayong serbisyo sa publiko.
Sa iyang welcome message, si Acting Branch Manager Hebrando Ortega nipadayag sa iyang kalipay sa pagbalhin sa bag-ong opisina. Sumala niya nga ang bag-ong opisina adunay mas dako nga lugar alang sa mas maayong serbisyo ngadto sa mga miyembro ug benepisyaryo.
“So, with the transfer of our office to this location, we have the following features which we do not have in our old office. We have ample parking space. We have enhanced our queuing system. We reduced waiting times and improved efficiency. This spacious layout gives better workflows and collaboration among us, the employees,” ingon ni Ortega.
Si Atty. Voltaire P. Agas, Officer in Charge sa SSS, naghatag usab og mensahe nga nagdasig sa tanan nga kliyente ug miyembro nga magpadayon sa ilang kooperasyon alang sa mas episyenteng serbisyo sa SSS.
“This occasion marks not only the opening of a new branch office but the renewal of deeper service, support and dedication to the SSS Stakeholders particularly the employers, member employees, pensioners, beneficiaries. We are here in Panabo to serve,” sulti ni Atty. Agas.
Atol sa maong okasyon, gipadayag usab ang usa ka espesyal nga pag-ila kang B.E. Dujali Mayor Leah Marie Moral-Romano, nga midawat og award gikan sa SSS tungod sa iyang kontribusyon alang sa pagpamiyembro ug pagbayad sa SSS contribution sa mga barangay functionaries sa ilang lungsod. Sa iyang mensahe, gipadayag ni Mayor Romano ang iyang suporta sa SSS ug nipasalig sa padayong paghatag insentibo sa mga barangay functionaries pinaagi sa SSS, aron masiguro nga makabaton sila sa benepisyo nga ilang gikinahanglan.
“Sa amon na lungsod, amon nakadawat kami sang award, kay tanang mga barangay functionaries, we consider them as frontliners, partners namon sa among tanan nga ginabuhat. Kay sila lang baya ang atoang madali-dali mapatrabaho sa pinakamubong hut-ong sa komununidad. So, to give protection and sense of social security para pud pag-retire nila, naa sila’y mabalikan, naa sila’y ma-enjoy and then kung ma-hospital, naa sila’y benefits o social security. Atong gi-enroll ang tanang barangay functionaries sa amon na lungsod,” matud sa mayor.
Ang kalihokan natapos dala ang kalipay, nga naghatag og paglaom alang sa mas episyente ug paspas nga serbisyo sa SSS alang sa katawhan sa Panabo ug mga kasikbit nga lugar. Ang pagbalhin sa mas lapad nga opisina nagpakita sa paningkamot sa ahensya nga mas daghan pang matabangan ug mapadali ang serbisyo alang sa mga miyembro ug benepisyaryo niini.
Writer: Nestor Mata, Jr.
