Padayon gihapon ang mga serbisyo sa Oplan KKK ni Governor Edwin “Kuya Gov” Jubahib bisan pipila ka adlaw o semana na ang milabay gikan sa pagpahigayon sa serbisyo caravan sa mga clustered barangay.
Resulta kini sa paspas nga pagtagad sa gobernador sa mga mulo sa katawhan, nga gipasibaw sa mga barangay officials atol sa Pulong-Pulong sa Barangay nga usa ka dakong bahin sa programang Oplan KKK (Kaagapay sa Kalinaw ug Kalamboan).
Si Kagawad Cyrian Vin Levueva, Chairman sa Committee on Infrastructure sa Barangay Council sa La Filipina, Tagum City, nakadayeg sa pag-aksyon dayon ni Kuya Gov sa ilang hangyo nga magrabahan ug ma-grader ang kadalanan nga wala pa masemento ug malimpyohan ang daplin sa sementado na nga dalan.
“Dako gyud ang among pasalamat sa probinsya sa Davao del Norte, gipangunahan ni Kuya Gov Edwin Jubahib, nga natagad gyud among problema… Giaksyonan niya dayon ang among hangyo… Ang serbisyo gipadala… Ninaog abot gyud sa kapurokan sa Barangay La Filipina,” sulti niya human ang pagtrabaho sa kadalanan niadtong Agosto 15, 2024.
Pipila ka kilometro nga dalan ang gitrabaho gikan sa Purok 1, Purok 2-b, Purok 3, Purok 4, ug Purok 8.
Kahinumdoman nga kapin duha ka semana na ang milabay gikan sa pagpahigayon sa Oplan KKK sa Barangay La Filipina niadtong Hulyo 30, 2024.
Mapasalamaton usab ang mga residente sa Barangay Liboganon, Tagum City sa dinalian nga pagtagad ni Kuya Gov sa ilang mulo nga ayohon ang ilang libaong nga dalan nga nadaut sa pagbaha sa lugar.
Dili lang “like” pero dako kaayo nga “heart” ang gihatag ni Liboganon Barangay Kagawad Chosette Manliguez sa pagpaminaw sa gobernador sa ilang mga hangyo, atol sa pakigpulong niya kanila sa paglusad sa Oplan KKK sa Barangay Bingcungan niadtong Hulyo 23, 2024.
"Katong paghangyo namo kay Kuya Gov, nakita gyud niya ang mga gikinahanglan sa mga tao… Iya gyud gihatagan og pagtagad ‘tong among mga problema… Maong dako gyud namong pasalamat, isip kami nga naa mi diri sa Purok 6, Liboganon nga dako kaayo ang among “ heart” para kay Kuya Gov,"sulti niya.
Ang pag-rehab sa kadalanan usa lang sa mga problema nga gihatagan og pagtagad ni Kuya Gov.
Moarangkada na pud ang Oplan KKK sa ubang mga munisipyo sa probinsya, sugod sa New Corella, aron ihatud ang daghang mga serbisyo, sama sa libreng medical and dental services, social services, tambag legal, eye screening, x-ray, agriculture and veterinary services, livelihood training, first aid training, ug daghan pang uban. #
