Usa ka matahom nga hulagway sa panaghiusa ang gimugna sa pagtapad ni Governor Edwin “Kuya Gov” Jubahib samtang gipanguluhan ni Vice Governor Clarice “Clang-Clang” Jubahib ang Inaugural Session sa Sangguniang Panlalawigan (SP) ganinang buntag, Hulyo 7, 2025.
Pinakaunang higayon nga nahitabo kini sa kasaysayan sa SP, sanglit ang Vice Governor, isip Presiding Officer, o kung kinsa man ang iyang gitahasan nga mangulo, ang anaa lang sa podium aron pagmintinar sa kahapsay ug pagpasilitar sa “proceedings” sa session.
Ang inaugural session gilatid sa balaod aron pormal nga sugdan sa mga miyembro sa Sanggunian ang ilang trabaho sa pagpanday sa mga balaodnon ug usab aron sa pag-establisar sa mga lagda para sa hapsay nga operasyon sa legislative body.
Usa sab kini ka bag-ong oportunidad aron ilatad sa mga board member ang mga resolusyon ug mga ordinansa alang sa kabag-ohan ug kalamboan, lakip na ang progresibong legislative agenda sa unang termino ni VG Clarice.
Sa iyang mensahe sa mga opisyal, gilatid ni Kuya Gov ang pag-level up sa mga programa nga iyang nasugdan aron makab-ot ang inklusibo, balance ug maluntarong kalamboan.
Kini ang pagpakusog sa mga programa sa panlawas, edukasyon, inprastraktura, agrikultura, panginabuhian, pabalay, pagpanalipod sa kinaiyahan, pagpatunhay sa kalinaw ug kahapsay, ug uban pa.
Lakip sab niini ang pagpakusog sa Zero-Billing Program, pagpalapad sa DavNor KAAGAPAY Program, pagsanta sa Fusarium Wilt, pagpakusog sa mga imprastraktura ug Oplan Canal Program, pagsolbad sa kriminalidad ug pagmintinar sa insurgency-free status sa probinsiya.
Miawhag si Kuya Gov sa hingpit nga suporta sa mga lideres ug sa tanang sector aron sa pagkab-ot sa hiniusang tumong nga himuong Premier Province ang Davao del Norte sa intero nasud Pilipinas.
“I am calling on each and every one of you – our leaders, our partners, and our people – to rally behind these bold ambitions,” sulti ni Kuya Gov.
Apil sa giaprubahan sa Inaugural Session sa SP ang Provincial Ordinance No. 2025-006, Providing for the Revised Rules of Procedure Governing Administrative Cases Files Before the Sangguniang Panlalawigan of Davao del Norte ug Provincial Resolution No. 541, Approving the Internal Rules of Procedure of the Sangguniang Panlalawigan of Davao del Norte for Term 2025-2028.
Writer: Noel Baguio
