Gipasalig ni Governor Edwin “Kuya Gov” Jubahib nga mahimong triple ang iyang pagkakugihan sa ikatulo niyang termino isip gobernador sa probinsiya sa Davao del Norte.
Kini ang gipaniguro sa bantogan nga gobernador, human siya ni-file sa iyang Certificate of Candidacy (COC) sa Commission on Elections (COMELEC) Provincial Office alas 2:30 sa hapon niadtong adlawng Sabado, Oktubre 5.
“Kung unsa man ko kakugihan sa akong pagka-governor sa akong first term ug second term mas triple pa ang akong pagkakugihan karon sa akong third term kay mao na ang legacy nga akong gihunahuna nga akong mabilin sa katawhan,”sulti ni Kuya Gov.
Naniguro karon ang gobernador nga mas magmalampuson ang iyang mga programa ug proyekto alang sa katawhan kung siyento porsiyento ang suporta sa iyang bise gobernador, rason nga iyang gituboy ang iyang kamaguwangang anak nga si Clarice “Ate Clang-Clang” Jubahib aron mahimo niyang bise gobernadora.
"Kung ang katawhan ipadayon ang paghatag pagsalig ug paghigugma sa pamilya Kuya Gov Jubahib, paningkamutan namong duha (ni Clarice), ug kuyog sa among mga board members ug elected local officials… maningkamot ming tanan para sa padayon nga pag-uswag ug paglambo sa probinsiya sa Davao del Norte,”ingon sa gobernador.
Una nang mi-file sa iyang CoC niadtong Biyernes, Oktubre 4, si Clarice isip kandidato pagka-Vice Governor isip ka-tandem ni Kuya Gov.
Mismo si Comelec-XI Regional Director Atty. Michael Abas ang mipasilitar sa CoC filing ni Kuya Gov, kauban si Provincial Administrator Engr. Josie Jean Rabanoz, nga mikandidato pagka-Board Member sa Distrito 2, ug sila Board Member Prospero Estabillo, Roger Laguna, John Dimitri Satur, ug Ronald Eliot nga modagan pagka-Board Member sa Distrito 1 sa Davao del Norte.
Butyag ni Kuya Gov nga prayoridad sa iyang ikatulo nga termino ang pagpadayon sa Zero-Billing Program, pag-sustenar sa kalinaw, labi na ang pagka-insurgency-free sa Davao del Norte, pag-agni sa mas daghang negosyante nga mamuhunan sa probinsya, pagtukod sa mas daghang imprastrasktura, samot pagpapaspas sa paghatud sa mga nag-unang panginahanglanon sa katawhan ug daghan pang uban.
Mihatag sab suporta sila BM Nicandro Suaybaguio, nga midagan pagka-Congressman sa District 1, ug sila Tagum Mayor Allan Rellon, San Isidro Mayor Silvano Gaje, ug Panabo City Mayor Jose Relampagos, Santo Tomas Vice Mayor Ricky Inodio-an, ug uban pang mga local officials.
Una mi-file sa ilang CoC, mipahigayon og balaang misa ang kampo ni Kuya Gov buntag sa Queen of Apostles College Seminary sa Tagum City, kauban ang ilang mga pamilya ug suporters.
Writer: Noel Baguio
