Nibisita si Senador Robin Padilla sa Barangay Gupitan, Kapalong, Davao del Norte niadtong Oktubre 16, 2024 aron personal nga motunol og pinansyal nga tabang ngadto sa usa ka libo ka benepisyaryo nga Indigenous People sa maong barangay. Ang matag benepisyaryo nakadawat og tag-₱3,000 ubos sa Department of Social Welfare and Development (DSWD) Assistance to Individuals in Crisis Situation (AICS) Program, nga dakong tabang sa mga IPs nga nagpuyo sa hilit nga lugar.
Sa iyang mensahe atubangan sa liboan ka mga dumuduong sa Sitio Dugayan, gipadayag ni Padilla ang iyang tinguha nga magpadayon ang suporta sa mga tribu aron mapaangat ang ilang panginabuhi ug aron mapalambo ang ilang komunidad. Gibati usab niya ang dakong respeto sa ilang kultura ug gumikan niini laraw karon sa senador nga amendahan ang Republic Act No. 8371 nga nailing Indigenous Peoples' Rights Act (IPRA) of 1997 aron mohaum sa kasamtangang panginahanglan sa mga katutubo.
“Nandito po ako dahil hinalal ninyo ako maging boses ninyo at lahat ng mga narinig ko dito na sinabi ng mga datu, gagawin ko po lahat ang aking makakaya para matupad yan… Ang trabaho po namin ay gumawa ng mga batas, mga batas na magbibigay proteksyon sa inyo. Katulad po nong IPRA Law. ‘Yong meron po tayong IPRA Law. ‘Yan po yong batas na nagbibigay proteksyon at karapatan sa mga Indio… Kailangan po natin yang amendahan, bakit? Dahil nakalagay po doon sa mga lupa ng mga indio na mga katutubo, one (1) percent lang ang kikitain nila kapag sila ay may minahan o mayroong ginagawa doon ang mga private o public na pagmimina, ang makukuha lang ninyo one (1) percent, isa lang. Hindi po tayo papayag ngayon, aamendahan po natin ‘yan. Dapat kung ano ‘yong ibinigay sa Bangsamoro, dapat ‘yan din ang ibigay sa mga Ips,” ingon ni Senador Padilla.
Gidayeg ni Mayor Ma. Theresa Timbol ang pag-abot sa senador sa maong lugar, sanglit dili lalim ang kalayo niini gikan sa kabihasnan ug tagsa lang mga national officials ang maisugong mosaka sa maong dapit. Gipaabot ni Mayor Timbol ang iyang kinasingkasing nga pasalamat ngadto sa senador nga nakahatag og inspirasyon kalakip sab ang kalingawan sa mga Indigenous People. Dugang ni Mayor Timbol nga misaad si Sen. Padilla nga mohatag og usa ka milyon dugang pondo para sa Kapalong District Hospital.
“Lipay kaayo ko nga niabot ang atong senador. Layo kaayo ang atong lugar pero nabati nako sa iya unsa ang gugma niya sa atong tribu. Nabati nako sa iyaha ang sinsero nga pagpanerbisyo sa katawhan sa Pilipinas, labi na diri sa atong Barangay Gupitan ug tibuok lungsod sa Kapalong… Si senator maghatag og one (1) million pesos nga ipondo sa atong hospital para tabang sa atong katawhan,” matud ni Mayor Timbol.
Pagkahuman sa programa, miapil si Senador Padilla sa usa ka boodle fight kauban ang mga lider sa tribu ug mga lokal nga opisyales, nga nagpakita sa panaghiusa ug pagpasalamat alang sa iyang pagbisita.
Pagkagabie, gipili ni Padilla nga matulog sa kabukiran sa Sitio Kimataan 2, diin gipahigayon ang usa ka espesyal nga ritwal nga gihimo sa mga tribal leaders. Atol sa maong seremonya, gibunyagan si Padilla og bag-ong pangalan nga “Datu Mahusay”, usa ka simbolo sa iyang pagdawat ug pag-ila sa kultura ug tradisyon sa mga katutubo.
Writer: Nestor Mata, Jr.
