Personal nga gitunol ni Governor Edwin “Kuya Gov” Jubahib ang cash assistance alang sa mga biktima sa landslide sa New Corella niadtong Hulyo 26, 2024, sa PGO Conference Room, Capitol Main Building, Mankilam, Tagum City.
Mokabat sa 18 ka pamilya ang nahatagan og ayuda. Ang 16 niini gikan sa Brgy. Sta. Fe nga nidawat tag- ₱10,000 tungod kay totally damaged ang ilang panimalay, samtang duha ka pamilya gikan sa Brgy. Mambing nidawat og tag- ₱5,000 kay partially damaged ang ilang balay.
Sumala ni Kuya Gov, bisan og gamay ang cash assistance nga nahatag pinaagi sa Provincial Social Welfare and Development Office, dako na kini nga tabang aron makabangon ang mga biktima sa trahedya nga ilang nadangatan.
“Kami di mi moundang sa pagpaningkamot para makahatag suporta ug kaayohan sa katawhan sa tibuok probinsya,” sigon ni Kuya Gov.
Giklaro sab sa gobernador atubangan sa mga benepisyaryo nga ang kantidad sa ilang gipirmahan mao gyud ang ilang madawat.
“Wala gyud ni labis, walang kulang. Insakto gyud ni. Kung ₱10,000inyong gipirmahan, ₱10,000 gyud nang inyong madala nga cash ug kadtong duha nga tag-₱5,000 ang gipirmahan, tag-₱5,000 gyud na. Wala gyud ni bawas. Ako lang nang i-clear kay nauso na karon diri sa atong probinsya nga mopirma og ₱5,000 unya P1,000 lang ang madala,” sumala sa gobernador.
Gisaysay ni Governor Jubahib ang usa sa iyang mga programa, ang pagtanom og durian. Gusto niya kining palapdan ug ipatuman sa tibuok probinsya aron makahatag og dugang nga income sa mga mag-uuma. Mohatag siya og semilya sa durian ngadto sa mga mag-uuma nga interesado motanom niini.
“Ang income sa durian dili mobaba og ₱20,000 per puno, ang inyong kitaon ‘pag mobunga na gyud ang durian. So, kung makatanom mo og baynte ka punoan, pasabot naa mo’y ₱400,000 sa usa ka tuig. Not bad na. Mao ‘ning nangita ko’g programa karon sa agriculture nga sustainable para nga long term nga inyong mapahimuslan nga mokita gyud mo,” sulti niya.
Ang katuyoan sa pagtunol sa Emergency Shelter Assistance mao ang paghatag og temporaryong puy-anan ug pinansyal nga tabang alang sa mga pamilya nga biktima sa kalamidad o krisis aron matabangan sila sa pag-ayo ug pagbangon gikan sa mga kadaut nga ilang natagamtaman.
Writer: Nestor Mata, Jr.
