Gipahigayon ang unang quarter meeting sa Provincial Peace and Order Council (PPOC) sa VIP Clubhouse, DNSTC, Mankilam, Tagum City niadtong Enero 17, 2025. Ang maong kalihokan gipangulohan ni Gobernador Edwin "Kuya Gov" Jubahib ug gitambongan sa mga representante gikan sa lain-laing ahensya sa nasyonal ug lokal nga panggamhanan, ug mga department head sa Provincial Capitol nga gipangunahan ni Provincial Administrator Atty. Ralph Dela Cruz.
“Ito ang umpisa natin para pag-usapan natin ang mahalagang bagay para sa ating probinsya especially regarding to the sustainment of insurgency-free province. And also, about sa intervention natin sa pag-increase ng drugs problem natin sa probinsya,” sulti ni Kuya Gov.
Gipasiugdahan sa maong meeting ang pag-aprobar sa usa ka resolusyon nga nagtugot kang Gobernador Jubahib nga ipagawas ug gamiton ang Confidential Fund sa probinsya alang sa Calendar Year 2025 nga nagkantidad og PHP 12,000,000.00.
“Motion for approval of the passage of resolution authorizing the Governor to release and utilize the confidential fund of the province for the calendar year 2025 amounting to P12,000,000, our proposal is P31,000,000 but the approved amount in the Sangguniang Panlalawigan is only P12,000,000,” matud sa gobernador.
Gidiskasan sa maong tigom ang mga lakang alang sa seguridad ug preparasyon sa umaabot nga eleksyon karong Mayo 12, 2025. Ang maong preparasyon gipunting aron masiguro ang malinawon ug hapsay nga pagdumala sa eleksyon sa tibuok probinsya sa Davao del Norte.
“Kailangan natin na dito sa Davao del Norte ang eleksyon ay mananatili na peaceful and honest election. So, kailangan natin masuportahan ang ating mga kapulisan at kasundalohan para makontrol ang mga problema at hindi natin papayagan na magkaroon ng malaking problema,” dugang ni Gov Jubahib.
Gituki sab ang pagmugna sa Davao del Norte Task Force aron mapakusgan pa ang seguridad sulod sa probinsya ilabina sa mga utlanan nga magsilbing harang alang sa mga dautang elemento nga buot musolod dala ang nagkadaiyang ginadili nga kontrabando sama sa droga.
Ang kalihokan nagpakita sa kooperasyon ug koordinasyon sa tanang mga sakop sa PPOC aron mapahugtan ang seguridad ug kalinaw sa probinsya.
Writer: Nestor Mata, Jr.
