Hingpit nang mapuslan sa publiko ang bag-ong konkretong dalan sa Brgy. New Visayas padulong Tulalian sa Sto. Tomas ug vice versa. Sa usa ka makasaysayanong okasyon, gipangunahan ni Governor Edwin I. Jubahib kauban ni Department of Agriculture (DA) Regional Executive Director Macario D. Gonzaga ang Blessingan ug Turnover Ceremony sa maong 7.845 km farm-to-market road (FMR) nga naglangkob og duha ka tulay, niadtong Oktubre 21, 2024.
Gawas sa pulido nga pagkahimo, sayo kini nahuman – tulo ka bulan una pa ang date of completion. Gidayeg ni RED Gonzaga ang mga nagpaluyo sa proyekto gikan sa Probinsyal nga Panggamhanan sa Davao del Norte, ang Provincial Project Management and Implementation Unit (PPMIU), ug uban pang opisina, labi na ang partner contractor nga Meyer Construction Services.
“Ang atong pahalipay and again congratulations to our contractor nga gipasidunggan nato karon lang, ang Meyer. Kay suma pa ilang gihuman ang maong proyekto three months before sa ilang contractual date to finish… “As we turnover this project today, we are not merely completing a task. We are laying a foundation for long term development and benefits here,” sulti ni RED Gonzaga.
Dako na ang bintaha ug kahayahay nga masinati sa 21,684 katawhan nga direktang makabenepisyo sa proyekto (base sa PSA 2020), lakip na ang 945 ka Indigenous People (IP), 3,832 ka farming household, ug 7,665 ka mag-uuma.
Mas dali na ang pagbyahe, gikan 20 minutos, mahimong 13 minutos na lang. Mas ubos na ang hauling cost latas sa mosunod nga 20 ka tuig. Lauman sab ang pag-usbaw sa produksyon sa mga nangunang tanom sama sa 97.62 ektaryang dugang palapad sa kalubin-an ug 22.8 ektarya alang sa goma.
Panahon sa konstruksyon, kini nga proyekto nakamugnaog trabaho nga nakahatag oportunidad alang sa 43ka mgaskilled workersug 20ka mgalaborers.
Sa iyang mensahe atol sa turnover ceremony, gibutyag ni Governor Jubahib ang iyang kalipay sa dakong tabang nga mahatag niini sa katawhan.
"Sukad sa akong pagka-governor, mao na ang usa nako nga dakong pangandoy nga ang katawhan sa probinsya sa Davao del Norte especially sa mga kabarangayan. Kinahanglan atong mahatud sa katawhan ang konkretong kalsada para nga dili na maglisud ang katawhan sa pagbyahe sa inyong mga produkto ug sa inyong pagbyahe paingon sa inyong mga trabaho,” matud sa gobernador.
Gisaysay pud niini ang iyang sunod nga plano human sa kalsada nga mao ang pagbutang og drainage, kay sumala pa, kinahanglan ang tanang kalsada dunay kanal aron makontrol ang problema sa baha. Pasalig sa gobernador nga dili siya moundang sa pagpangayo og proyekto, pagpangayo og tabang gikan sa nasyonal ug gikan sa World Bank ug European Union.
Miabot og P149.76 milyon ang pondo gikan sa WB ug EU ug P18.72 milyon counterpart gikan sa PLGU ilawom sa Philippine Rural Development Project (PRDP) sa Department of Agriculture. Gilauman nga makatabang kini og dako sa mga lokal nga mag-uuma, ilabi na sa pagpanguna sa ilang mga produkto nga mangga, saging, goma, cacao, mais, ug lubi.
"Ang hagit karon sa mga barangay officials… Ampingan nato na atong mga kalsada kay dili lang na para sa inyoha. Ang makabenepisyo pa niana, ang mga sumusunod, the next generations to come. For sure malipay sila kay dili na sila mag-antos," ingon ni RED Gonzaga.
Pagkahuman sa maong turnover, gipahigayon usab ang groundbreaking ceremony alang sa Kipalili-New Loon FMR sa San Isidro, nga mao ang unang proyekto nga naaprobahan ilalom sa PRDP Scale Up sa tibuok rehiyon onse. Kini nga proyekto mao usab ang ika-10 nga PRDP FMR subproject nga giimplementar sa PLGU sa Davao del Norte.
Writer: Jun Rey Villanueva
