Aron palig-onon ang kaalam ug kahanas sa tukmang pagdumala sa mga dokumento sa gobyerno, 50 ka empleyado sa nagkadaiyang departamento sa Kapitolyo sa Davao del Norte ang nisalmot sa Basic Records Management Training nga gipasiugdahan sa Provincial Government ubos sa pagdumala ni Governor Edwin I. Jubahib.
Gipahigayon ang maong kalihokan sa Bulwagan ng Karunungan, Government Center, Mankilam, Tagum City, niadtong Marso 21, 2025, nga nagtumong sa pagpalambo sa abilidad sa mga kawani sa pag-organisar ug pagmentinar sa hapsay nga sistema sa dokumentasyon.
Ang mga partisipante naglakip sa mga empleyado gikan sa Provincial Treasurer's Office (PTO), Provincial Budget Office (PBO), Office of the Secretary to the Sanggunian (OSS), ug uban pang mga departamento. Matud ni Provincial Human Resource Management Officer Edwin Palero, kini nga training usa ka lakang aron masigurado nga hapsay ug episyente ang pagproseso sa mga papeles sa mga opisina, nga usa ka kritikal nga aspeto sa epektibong serbisyo publiko.
Gipangulohan sa Civil Service Commission Region XI (CSC XI) ang paghatag og leksyon ug giya sa mga partisipante, diin ilang gipasabot ang mga sumbanan sa maayong pagdumala sa rekord. Si Reilee Jill Renee Villanueva, Senior Human Resource Specialist sa CSC XI, mipasiugda sa kamahinungdanon sa organisado ug sistematikong paghipos sa dokumento.
"Igo ug hapsay nga rekord management makatabang sa episyenteng pagproseso sa serbisyo publiko," matud ni Villanueva.
Gipasiugda usab niya nga ang Daily Time Record (DTR) sa mga empleyado usa sa labing mahinungdanong dokumento nga angayng tukma tungod kay kini mahimong basehan sa imbestigasyon kung adunay reklamo o kalapasan nga gipasaka batok sa usa ka empleyado.
Ang mga kawani gitudloan sa nagkalain-laing estratehiya sa pagdumala sa rekord, pag-index sa mga dokumento, ug pag-establisar og file tracking system aron malikayan ang pagkawala o pagka-delay sa mga papeles. Gipahimangnoan usab sa CSC XI nga ang dili tukmang paghipos sa mga dokumento mahimong hinungdan sa kasamok sa opisina ug paglangay sa mga transaksyon sa publiko.
Pinaagi sa maong inisyatibo, gilauman nga mas mapalig-on ang sistema sa dokumentasyon sa Kapitolyo, nga maghatag og mas paspas ug episyenteng serbisyo alang sa katawhan sa Davao del Norte.
Writer: Lorna Tripoli
