Gipahigayon ang inagurasyon sa bag-ong tukod nga Provincial Warehouse sa Capitol Compound, Mankilam, Tagum City, kaniadtong Disyembre 6, 2024. Ang maong pasilidad gitukod aron suportahan ang kaandam sa probinsya sa pag-atubang sa mga kalamidad pinaagi sa pagtipig sa mga pagkaon ug dili pagkaon nga ayuda. 

Gipasabot ni Rosalinda Rapista, ang Provincial Social Welfare and Development Office (PSWDO) Head, ang dakong papel sa warehouse alang sa kaluwasan sa mga komunidad sa panahon sa emerhensiya.

“So, ma-notice ninyo gigahinan gyud ni gagmay-gagmay atong budget in order to realize kani nga building. This serves as repacking area, stock filing area kani nga building plus naa pa ‘tong original nga mga gagmay didto nga mga warehouse,” matud ni Rapista.

Si Gale Mortillero, Assistant Provincial Administrator for Administration, nagdala sa mensahe ni Provincial Administrator Atty. Ralph Dela Cruz. Gipahibalo niya nga ang proyekto usa ka timaan sa dedikasyon sa administrasyon alang sa kalig-on batok sa mga kalamidad.

“With this facility we ensure the swift mobilization of resources to address the immediate needs of our constituents in the event of calamities,” sulti ni Mortillero.

Gipadayag ni Executive Assistant IV Leomel Puerto ang mensahe ni Gobernador Edwin "Kuya Gov" Jubahib, nga nagsulti bahin sa panlantaw sa gobernador alang sa usa ka andam ug lig-on nga probinsya.

“This warehouse is more just a building. It is a testament that our collective resolve to build a safer, more prepared, and resilient Davao del Norte. With its completion we now have the capacity to efficiently store and manage vital supplies, equipment, and resources that are critical for disaster preparedness, response and recovery,” ingon ni Puerto.

Si Provincial Disaster Risk Reduction and Management Office (PDRRMO) Head, Glenda Delideli, misulti kabahin sa kaimportante sa koordinasyon ug kaandam sa pagdumala sa kalamidad.

“Puhon kung mahitabo man galing ang ginaplano ni Kuya Gov because Kuya Gov is very visionary for this Province to become disaster resilient. One of those is the construction of the evacuation center,” matud ni Delideli.

Ang warehouse gitukod aron mahimong storage area sa mga pagkaon, hygiene kits, ug uban pang relief goods nga dali mapakatap sa panahon sa mga kalamidad nga posibleng moigo sa probinsya.

Writer: Nestor Mata, Jr.