Taliwala sa kainit sa panahon ug subidahong bukid, dungan nga gitisok sa 400 ka planters ang mga kawayan sa Sitio Kapatagan, Barangay Gupitan, Kapalong niadtong Oktubre 18, 2024. Kini kabahin sa Kawanihan program nga gilangkoban sa 16 ka mga clusters nga adunay 25 ka mga partisipante matag grupo.
Gipangunahan sa Department of Science and Technology (DOST) Mindanao, kauban ni Governor Edwin I. Jubahib, sa Department of Environment and Natural Resources, ug pipila ka departamento sa kapitolyo ang nasangpit nga inisyatiba. Tumong niini nga makab-ot ang Guinness World Record alang sa pinakadaghang tawo nga dungang nagtanom og kawayan sa tibuok Mindanao.
Matud ni DOST Mindanao Regional Director Dr. Anthony Sales, dili lamang kini usa ka paningkamot sa pagkab-ot sa world record, apan usa ka dakong lakang aron ma-promote ang industriya sa kawayan sa rehiyon.
"Beyond you know the world record gusto nato nga ang bamboo mahimong industriya dinhi sa Davao region and kabalo man ta nga ang bamboo can be used for different purposes. Pwede siya sa construction, pwede siya sa housing, pwede siya sa handicraft, pwede gani sa food. Ginakaon nato ang bamboo shoots, so daghan og uses, kailangan lang i-promote ang technologies nga available na sa DOST nga i-adopt sa mga community ug i-adopt sa mga local government units,” sulti ni RD Sales.
Gibutyag ni Gov. Jubahib nga ang pagpakusog sa industriya sa kawayan dako’g tabang sa ekonomiya ug pagprotekta sa kinaiyahan.
"Dako kaayo’g impact kay ang bamboo, engineered bamboo na ni siya, so pwede na siya mo-produce og mga pwede siya pangpalit nato sa mga flywood materials. Pwede ni siya himoon instead nga wood. Pwede na ang bamboo ang atong gamiton nga materials para maka-produce ta og fiber flywood ug matawag na ni siya og bamboo wood," matud ni Gov Jubahib.
Giawhag sab ni Gov. Jubahib ang mga LGUs ug mga katawhan nga mananom na og kawayan.
"Para sa atong mga kaigsoonan sa probinsya sa Davao del Norte sa mga Dabaonon. So, i-practice na nato karon ang pagtanom og bamboo, mga area nga walay mga tanom, ug labi na sa mga hilling part sa mga lugar sa atong probinsya, ato na ni siyang itanom ug gi-encourage nako ang tanang LGUs nga mag-lead, mag-text sa pagtanom ani nga bamboo para mas mahulog nato ni siya nga double whammy, maka-restore ta sa atong environment at the same time makahatag ta og income sa atong mga kaigsoonan. So, mahimo siyang income generating project,” dugang sa gobernador.
Ang Kawayanihan program gipartisiparan sa mga ahensiya sa gobyerno, sa LGU Kapalong, mga kasundalohan, ug kapulisan sa Davao del Norte. Kini nga kalihokan nahisubay sa Green, Green, Green Program sa probinsya, sa pag-atiman sa kinaiyahan.
Writer: Lorna Tripoli
