Kalipay ug kahupay ang nabati sa mga benepisaryo sa Emergency Shelter Assistance ug Aid for Distressed and Repatriated OFWs nga gitunol sa Probinsiyal nga Panggamhanan sa Davao del Norte kagahapong adlawa, Hulyo 28, 2025.
Gitunol ni Executive Assistant II Emelio Baguio, Provincial Social Welfare and Development Officer Rosalinda Rapista, kauban si Assistant PG Department Head Lanny Guinit ang balor P158,000 nga hinabang ngadto sa 33 ka mga benepisaryo.
Lakip niini ang 22 ka mga pamilya nga nawad-an og balay tungod sa sunog ug siyam ka pamilya nga nagubaan og balay tungod sa makusog nga hangin. Apil sab niini ang hinabang alang sa duha ka mga Overseas Filipino Workers (OFWs).
“(Nagapakita kini) sa abli nga kasing-kasing sa atong mahal nga gobernador alang sa pagpangalagad kanatong tanan,” sulti ni Baguio.
Apil si Jonel Macadaig, nga taga Barangay Mamacao, Kapalong, Davao del Norte ang nakadawat sa P10,000 shelter assistance, sanglit guba jud kaayo ang ilang balay nga natumbahan sa dakong kahoy gumikan sa paghapak sa kusog nga hangin kon ipo-ipo sa pipila ka mga dapit sa probinsiya niadtong Hunyo 28, 2025.
Sulti niya nga dakong kahupay sa ilang kaguol ang tabang sa Kapitolyo alang kanila kay nabati nila nga wala sila nag-inusara ug gipasagdan tungod kay anaa ang gobyerno sa panahon sa ilang panginahanglan.
“Dako kaayo ang akong pasalamat kay Kuya Gov kay naay ing-ani nga tabang para sa mga pobre. Wala mi nag-inusara, naa jud ang gobyerno. Salamat ky Kuya Gov nga natabangan jud mi nga makasugod na pud mi,” sulti ni Macadaig.
Gikaloy-an nga wala natabunan ang iyang asawa kay nakadagan ug nakagawas dayon kini sa ilang balay sa pagkatumba sa kahoy.
“Naigo jud bitaw sa kusog nga hangin nga sagol ipo-ipo natumbahan jud ang among balay og kahoy... Nakadagan akong asawa… kusog pa jud kaayo ang ulan pero wala siya natabunan kay nakagawas man siya dayon. Dako ang akong pasalamat sa Guinoo ato nga walay kinabuhi nga nakalas,” ingon niya.
Mapasalamaton sab ang OFW nga si Lyn Mantomingcal nga taga Barangay San Miguel, Tagum City, kay wala nibalibad kaniya ang buhatan sa Provincial Social Welfare and Development Office (PSWDO) sa iyang pagduol pagpangayo og tabang.
Emosyonal siya sa pagsaysay nga napugos siya pag-uli bisan pito ka bulan pa lang siya nagtrabaho sa Saudi Arabia gumikan kay nagsakit siya ug nadiskobrihan nga duna siya’y malignant myoma sa matris.
“Nanghinayang. Ang akong anak nga gusto nako makahuman og eskwela pero naudlot man ang tanan. Wala ko’y choice pero mouli na lang… Kay ako ra man nagbuhi sa akong anak since single mother ko. Sayang lang kay lisod ang kinabuhi sa Pinas,” bug-at nga pagsaysay niya.
Dakong pasalamat niya sa programa ni Kuya Gov aron tabangan ang mga sama niya nga nanginahanglan.
“Pasalamat ko sa programa ni Kuya Gov nga ako natabangan as a single parent OFW. Daghang salamat jud,” pagtapos niya.
Writer: Noel Baguio
