Nasungkit sa DavNor Blue Marlins Swim Team ang kinatibuk-ang kadaugan sa Kadagayaan Swimming Festival 2025 human makatigom og labing taas nga puntos nga 1,251 sa duha ka adlaw nga kompetisyon nga gipahigayon sa DavNor Sports and Tourism Complex, Mankilam, niadtong Hunyo 21-22.
Gipasiugdahan ang panagsangka isip kabahin sa ika-58 nga anibersaryo sa Araw ng Davao del Norte, nga nagtapok og kapin 400 ka swimmers gikan sa nagkalain-laing lugar sama sa Zamboanga, General Santos City, Bukidnon, Mati City, Davao de Oro, ug uban pang probinsya. Ang DepEd Tagum Division ang nangulo sa technical team sa pakigtambayayong sa Provincial Sports and Development Office (PSYDO) ug sa PLGU Davao del Norte.
Kini ang overall result ug puntos sa 10 nga nag-unang team sa kinatibuk-ang 30 ka mga teams:
DavNor Blue Marlins Swim Team – 1,251 points
HC Mantas Swim Team – 1,164.50 points
Zamboanga United Swimming Inc. – 660 points
Red Sail Arcadia Swim Team – 500.50 points
Grey Hawks Swim Team – 402 points
Kidapawan Long Wave Swim Team – 376.50 points
Davao Aqua Spears Swim Club – 329 points
Batang Pantukan Swim Team – 317 points
Lemmoda Aqua Gliders – 222.50 points
Tagum Green Dolphins Swim Club – 220 points
Mapasalamaton si Chito Palo sa DepEd Tagum sa padayon nga suporta ni Governor Edwin I. Jubahib, nga naghatag og uniporme, medalya, mga t-shirt, ug uban pang logistical needs alang sa mga partisipante. Matod pa niya, ang libre nga registration ug kompleto nga support system usa ka dakong tabang sa kalampusan sa kalihokan.
“Dili gyud namo makab-ot ang kalampusan sa event kung wala ang suporta sa atong gobernador, gikan sa venue hangtod sa papremyo,” matod ni Palo.
Ang Kadagayaan Swimming Festival usa sa mga highlight nga aktibidad sa Araw ng Davao del Norte, nga nagtinguha sa pagpasiugda sa kahimsog, sportsmanship, ug pagpalig-on sa panaghiusa sa komunidad. Gihimo kini nga plataporma sa probinsya aron mapalambo ang lokal nga talento sa paglangoy ug mapauswag ang interes sa sports sa kabatan-onan.
Writer: Lorna Tripoli
