Lima ka pamilya nga nabiktima sa sunog ug ipo-ipo sa Davao del Norte ang nakadawat og pinansyal nga tabang gikan kang Gobernador Edwin I. Jubahib ubos sa Emergency Shelter Assistance (ESA) program.

Niadtong Marso 12, 2025, ang Executive Assistant sa gobernador, Jemiel Melmida, kauban ang mga kawani sa Provincial Social Welfare and Development Office (PSWDO), nitunol og ₱10,000 alang sa mga pamilyang naugdaw ang panimalay ug ₱3,000 ngadto sa ₱5,000 kadtong partially damaged.

Lakip sa mga nakadawat sa ayuda mao sila Roberto Ababon sa San Isidro, Tagum City; Joselyn Rotoni sa Barangay Mankilam, Tagum City; ug Romely Espelita sa Palma Gil, Talaingod, puros nawad-an og pinuy-anan tungod sa sunog. Samtang, sila Marialyn ug Yulieta Miano sa Barangay Sto. Niño, Carmen, nakadawat sa tabang human maguba ang ilang balay tungod sa kusog nga hangin.

Gipaambit ni Roberto Ababon, usa sa mga biktima sa sunog, ang iyang kasinatian sa PTV News Team. Matud niya,“Paglakaw namo mga alas-6 pasado ana, pag-uli nako mura ko’g naalimungawan kay naugdaw na tanan.”

Dili niya matago ang kasubo, apan mapasalamaton siya sa hinabang nga ilang nadawat. “Daghan kaayog salamat Kuya Gov sa tabang, makasugod na pud mi ani. Daghan kaayong salamat.”

Gipasabot usab ni Melmida nga bisan dili dako nga kantidad, apan kinasingkasing kini ug makatabang sa ilang sitwasyon samtang nagpadayon ang ilang pagpangita og mas lig-on nga solusyon.

Ang Probinsyal nga Panggamhanan sa Davao del Norte, pinaagi sa ESA program, padayon nga naghatag og pinansyal nga tabang alang sa mga biktima sa mga kalamidad, aron matabangan silang makabangon ug makasugod pagbalik.

Writer: Lorna Tripoli