Gihimo ang validation sa Competency-Based Strategic HRD Plan alang sa calendar year 2025-2027 sa Provincial Government of Davao del Norte sa Bulwagan ng Karunungan, Government Center, Mankilam, Tagum City.

Sumala ni Edwin Palero, ang Provincial Human Resource Management Officer (PHRMO), nagbatbat sa kamahinungdanon sa maong kalihokan nga nagsilbing plataporma aron susihon ug i-validate ang mga plano alang sa umalabot nga mga tuig sa pagpalambo sa kahanas ug katakos sa mga empleyado sa probinsya.

“Nagsugod ni sa pagtan-aw sa mga knowledge, skills ug attitude or in other words, competency, nga kinahanglanon nga i-possess sa usa ka empleyado sulod sa inyong opisina aron ma-perform ang iyang task and function. Bisan unsa ka gwapo sa plano sa usa ka ahensya kung ang every workforce, kita nga mga empleyado, dili nato ma-perform ang atong trabaho as expected, de nada ang atong mga programa ug mga proyekto,” ingon ni Palero.

Sa samang higayon, si PHRMO Senior Administrative Officer (SAO) Dr. Michelle Claridad, ang gitahasan sa pagpresentar sa Competency-Based Strategic HRD Development Plan. Gibatbat ni Dr. Claridad ang mga tumong sa maong plano, nga naglangkob sa pagpalambo sa kahibalo, kahanas, ug abilidad sa mga kawani sa probinsyal nga panggamhanan, aron masiguro ang maayong pag-alagad sa publiko ug ang pag-atubang sa mga umalabot nga panginahanglanon ug hagit.

Ang aktibong partisipasyon sa mga empleyado sa Kapitolyo ug mga department heads naghatag og kalig-on sa kalihokan, nga nagpakita sa ilang kooperasyon ug pagpaningkamot nga mapalambo ang mga proseso ug serbisyo alang sa probinsya sa umalabot nga mga katuigan.

Ang validation nagresulta sa usa ka mas lig-on ug mahinungdanong HRD Plan, nga gilangkoban sa mga estratehiya nga tukma alang sa mga panginahanglanon sa mga empleyado ug sa probinsya, pinaagi sa mga competency-based approach, ug maampingong risk management.

Writer: Nestor Mata, Jr.