Gipaambit sa Bureau of Jail Management and Penology (BJMP) ang ilang mga kalihokan, plano, ug serbisyo alang sa mga Persons Deprived of Liberty (PDL) atol sa programa sa PTV DavNor 48 nga "Kasamtangang Katikaran sa Kalamboan" (KKK) niadtong Enero 14, 2025, sa pagdumala ni Provincial Information Officer Dr. Mervin Jay Suaybaguio. Kini nga pasilidad, nga nahimutang sa Purok 3 Dagohoy, Barangay Canocotan, Tagum City, nagdumala sa 160 ka PDL, diin 80% kanila anaa sa mga kaso sa paglapas saR.A. 9165o Comprehensive Dangerous Drugs Act of 2002.
Sumala ni SJO3 Roger Calantoc, kabahin sa ilang mga serbisyo ang mga livelihood programs sama sa coin bank ug handicraft making, ug painting. Gipailalom usab ang mga PDL sa Alternative Learning System (ALS) alang sa elementarya, high school, ug senior high.
Gipatuman usab angE-Dalaw Program, nga nagtugot sa mga PDL nga makontak ang ilang mga pamilya gamit ang electronic communication system, nga gisugdan pa niadtong pandemya ug nagapadayon hangtod karon. Gipalig-on usab ang interfaith programs aron masiguro ang espirituwal nga suporta alang kanila.
Aduna silay regular medical check-ups alang sa mga masakiton, ang "Totok Gamotan", labi na sa mga mataptan og tuberculosis. Ang mga PDL ug BJMP personnel gipailalom usab sa monthly drug test aron masiguro ang disiplina ug kahimsog.
Ang BJMP Tagum aktibong nag-apil sa mga community relations activities sama sa coastal clean-up, tree planting, ug Adopt-A-Classroom program. Ang mga personahe nanguna usab sa pagsiguro sa maayong pagdumala ug proteksyon alang sa PDL sa panahon sa hearing sa korte.
Gisugdan ang operasyon sa Tagum City Male Dormitory niadtong 1996 nga adunay 39 ka PDL. Karon, ang pasilidad nagmalampuson sa pag-atiman ug pagpalambo sa mga PDL pinaagi sa suporta gikan sa LGU Tagum, private stakeholders, religious sector, ug PLGU Davao del Norte, ilalom sa liderato ni Governor Edwin I. Jubahib.
Gipaniguro ni SJO4 Felix Jo, Jr., ang Chief Administration sa BJMP Tagum, ang mga PDL, lakip na ang mga babaye sa Tagum City Female Dormitory, anaa sa maayong kahimtang.
“Ug dili lang para sa PDL Male Dorm ug sa mga kababaihan nga among PDL sa Tagum City Female Dormitory ayaw sab mo kaguol mga pamilya kay ang mga babae pud anaa sa maayong pagkabutang, dili lang mga lalaki, as a whole sa Tagum City Jail maayong pagkabutang,” ingon ni SJO4 Jo.
Ang BJMP Tagum padayon nga nagtinguha nga sa paghuman sa sentensya, ang mga PDL mahimong magmalampuson ug produktibo balik sa komunidad.
Writer: Lorna Tripoli
