Giaksyonan gilayon sa Provincial Engineer’s Office (PEO) ubos sa kamandoan ni Governor Edwin I. Jubahib ang hangyo sa mga magtutudlo ug opisyales sa Barangay Bincungan, Tagum City, nga mabutangan og barrier o harang ang dalan duol sa mga eskwelahan.
Niadtong Marso 18, 2025, gimontar sa PEO ang 21 ka temporary barriers sa tunga sa national highway, atubangan sa Bincungan Elementary School ug Bincungan National High School. Kini nga lakang nagtumong aron malikayan ang disgrasya, ilabi na sa mga kabatan-onang motabok sa maong dalan.
Si Ryan Carakol, usa ka magtutudlo sa Bincungan, mipadayag sa PTV DavNor News Team nga usa ka insidente sa maong dalan ang misangpot sa kamatayon sa ilang estudyante. “Sa 10 years nako nga nagtudlo diri, naa gyuy usa ka bata nga nabanggaan og sakyanan ug namatay,” iyang pagbutyag.
Gipasalamatan sa mga magtutudlo ang maong inisyatiba kay makapakunhod kini sa ilang kabalaka sa kaluwasan sa mga estudyante. “Nagpasalamat mi sa probinsya sa pagbutang ani nga barriers. Mas hinay na ang dagan sa mga sakyanan ug mas luwas na ang mga bata sa ilang pagtabok,” dugang ni Carakol.
Sumala ni Pantaleon Canion II, staff sa Barangay Bincungan, dugay na nilang gitinguha nga mabutangan og harang ang maong dalan. “Mihangyo gyud si kapitan didto sa probinsya aron matubag ang among panginahanglan. ‘Pag request namo gahapon, awtomatik nga gihatag karon,” matud niya.
Ang maong mga barrier molungtad og lima ka tuig samtang nagpaabot sa dugang long-term nga solusyon.
Writer: Lorna Tripoli
