Gipasidunggan sa Sangguniang Panlalawigan si Provincial SK Federation President Helen Mae Discaya alang sa iyang kalampusan nga nakab-ot isip cum laude sa kursong Bachelor of Science in Biology, Major in Animal Science sa University of Southeastern Philippines, Davao City.

Si Discaya, nga mao ang pinakabatan-ong board member sa Davao del Norte, nagdala og dungog ug garbo alang sa probinsya. Kahibaloan, consistent honor student ang youth leader sukad pa sa elementarya diin duna siya’y honor awards sa Maniki Elementary School, high honors sa Kapalong National High School ug karong tuiga, taliwala sa liboan ka mga estudyante sa naasoyng unibersidad, usa siya sa nakadawat og latin honors.

Ang sertipiko nga nagdayeg kaniya isip malampusong gradwado gilagdaan ni Governor Edwin Jubahib ug gitunol ni Vice Governor De Carlo Uy, uban sa mga board members, atol sa ika-34 nga regular session sa Sangguniang Panlalawigan Hall, Capitol, Mankilam, Tagum City, kaniadtong Agosto 19, 2024. Kauban ni Discaya ang iyang amahan nga si Edson Discaya sa maong okasyon.

Ang pagtunol sa pasidungog kang Discaya nasubay sa SP Resolution No. 538, Series of 2024.

Writer: Lorna Tripoli