Giselebrar sa Davao del Norte Hospital - Carmen Zone ang ika-25 nga anibersaryo niini niadtong Septyembre 8, 2024, pinaagi sa mga kalihokan nga nagpakita sa ilang padayon nga dedikasyon sa paghatag og kalidad nga serbisyo medikal sa katawhan sa probinsya.
Gisugdan ang selebrasyon sa usa ka motorcade ug Sikad Float Parade libot sa nanag-unang kadalanan sa Carmen nga nakapalingaw sa mga lungsoranon. Gilangkoban sa nagkalain-laing departamento ang maong parada, nga nagpakita sa ilang pagtinabangay ug suporta sa mahinungdanong okasyon sa ospital. Gisundan kini sa usa ka misa-pasalamat, diin nagkahiusa ang mga staff sa ospital, mga lokal nga opisyal sa gobyerno, ug uban pang stakeholders aron magpasalamat sa Labawng Makagagahum ug sa kanunayng serbisyo nga gihatag sa ospital alang sa komunidad.
Nihatag og mainitong mensahe si Dr. Ruchille S. Arrocena, MD, FFSMSG, MAHA, ang Acting Chief of Hospital, nga naghisgot sa mga nahimo sa ospital sa milabay nga 25 ka tuig. Gisaysay niya ang dakong kausaban sa maong ospital gikan sa usa ka gamay nga pasilidad hangtud nidako kini ug naila isip usa ka maayong healthcare provider alang sa katawhan sa Davao del Norte.
“For years, we learned from the variety of experiences as we handle our patients, as we fight difficult situations. Daghan kaayo’g criticisms may it be actual or social media criticisms in order for us to attend excellence of providing a quality service. So, bisan pa man sa kalisud sa tanan nga naagian from 1999 up to now, naningkamot si Carmen District Hospital nga magpadayon og hatag sa serbisyo alang sa katawhan,” ingon ni Dr. Arrocena.
Nipaambit sab sa iyang mensahe si Provincial Economic Enterprise and Development Officer Dennis B. Develleres, Ll.B., diin iyang gipasidunggan ang mga doctor, nars, ug staff sa ospital tungod sa ilang katakos sa pagserbisyo ug dakong kontribusyon aron sa paghatud sa serbisyong medikal sa mga katawhan.
“Sa tinuod lang gyud, kining 25 years manifestation ni siya nga maayo ang atong pagpadagan tungod kay bisan pa man sa kagamay sa subsidy nga nadawat nato ni-survive ang operation sa atoang ospital. Dili tungod sa inyohang mga leaders, tungod ni natong tanan. Kay kung dili tang tanan, wala gyud tay mahimo. Kada usa nato kabahin,” sulti ni Devilleres.
Atol sa maong programa gipahigayon sab ang awarding ceremony alang sa mga nagmadaugon sa gipahiyaong sportsfest sa maong ospital ug ang paghatag pasidungog sa mga empleyadong nagpakita’g igong katakos ug dedikasyon sa ilang trabaho.
Isip kabahin sa selebrasyon, gipangunahan ni Governor Edwin “Kuya Gov” Jubahib ang groundbreaking ceremony sa bag-ong OB-Gyne Building Complex, nagkantidad ₱25 milyones nga nahimutang sulod lamang sa compound sa ospital. Nagtimaan kini sa usa ka bag-ong yugto sa pagpalapad sa serbisyo sa ospital. Ang pagtukod sa OB-Gyne complex gilauman nga maghatag og mas maayo nga serbisyo alang sa mga inahan ug mga bata sa rehiyon. Maghatag sab kini’g espesyal nga pagtagad sa mga kababayen-an ug bag-ong natawo nga mga bata.
“Dili nato ma-measure kung unsa ta ka-happy this afternoon because ang atoang gi-aim o gipangandoy nato nga project nahatag gyud. Kaning atong ob-gyne building, dako kaayo ko’g pasalamat sa pagpaningkamot ni Dennis Devilleres, ang atong PEEDO Head, nga natubag gyud ning maong building dili lang kini aduna pay daghang coming nato nga building nga nagkantidad ₱200 million,” matud ni Kuya Gov.
Ang ika-25 nga anibersaryo sa Davao del Norte Hospital - Carmen Zone dili lamang naghanduraw sa mga nahimo niini sa miaging mga katuigan, apan usa usab ka lakang padulong sa pagpauswag sa mga serbisyo sa healthcare sa umalabot nga mga adlaw, nga nagpalig-on sa ilang papel isip usa ka sukaranan sa pag-atiman sa kahimsog sa probinsya.
Writer: Nestor Mata, Jr.
