Opisyal nang gideklara sa Commission on Elections (Comelec) ang pagsugod sa election period niadtong Enero 12, 2025. Kauban sa maong deklarasyon ang pagpatuman sa election gun ban, diin walay pilion lakip na ang mga miyembro sa law enforcement units.
Atol sa programang Kapihan sa DavNor nga gidumala ni PIA Inforcen Manager Jeanevive Abangan nga madungog sa Radio 911 ug PTV DavNor 48, gipahayag ni Election Supervisor Atty. Norberto Sinsona, Jr. sa Comelec Davao del Norte Field Office ang mga importanteng detalye kabahin sa election period. Matud niya, magsugod ang campaign period alang sa mga national candidate ug partylist karong Pebrero 11, 2025, samtang ang campaign period alang sa mga local candidate sugdan sa Marso 28, 2025.
Sumala ni Atty. Sinsona nga masaligan sa publiko ang mga bag-ong vote-counting machine gikan sa South Korean firm Miru Systems nga gamiton sa umaabot nga eleksyon isip hulip sa Smartmatic nga gidiskwalipika sa COMELEC gumikan sa nagkadaiyang isyu nga ilang giatubang. Giawhag sab niya ang katawhan nga magtinabangay aron masiguro ang hapsay ug malinawon nga eleksyon.
Samtang nanawagan si Aty. Sinsona sa mga indibiduwal nga buot magpa-exempt sa gun ban nga mobisita sa ilang website ug didto mo-apply alang sa exemption.
Ang maong deklarasyon gihimo sa Comelec isip pagpangandam alang sa umaabot nga May 12, 2025 national ug local election.
Writer: Nestor Mata, Jr.
