Giisa-isa na og tuman ni Governor Edwin “Kuya Gov” Jubahib ang iyang mga saad sa katawhan, gikan sa iyang pakigpulong sa mga opisyales sa matag barangay sa Tagum City sa mga niaging hugna sa Oplan KKK (Kaagapay sa Kalinaw ug Kalamboan).
Sa Purok Sunshine II, Barangay Visayan Village, dakong perwisyo para sa mga residente ang barado nga kanal sa ilang lugar, samot na kung ting-ulan. Hulga usab kini sa panlawas ug kahimsog sa mga residente, tungod sa mga sakit nga pwede mahatag niini, sama sa dengue.
Gani, ila kining gisumbong kay Kuya Gov sa ilang pakighimamat kaniya pinaagi sa Oplan KKK Pulong-Pulong sa Barangay niadtong Agosto 9, 2024 sa ilang lugar. Dako ang pagpasalamat sa mga residente tungod sa paspas nga pag-aksyon ni Kuya Gov.
"Mao na ang problema namo’g moulan diri, kay mga isa ka oras o duha ka oras, number one gyud akong balay mo-overflow… Mao gyud na’y problema, pila ka balay diri ang malunopan. Gumikan ani nga kanal, ang tubig dili kaayo makadaloy didto kay daghan nakabara. Dako pud ko’g pasalamat bisan wa pa matiwas. Pasalamat gyud ko kay nakahunahuna si Gov niini nga pamaagi, kay kung moulan og kusog-kusog, modaloy na ni. Mao nang pasalamat mi kay Gov kay giaksyonan ba nga makuhaan ang problema sa mga tao gumikan sa ulan," sulti ni Federico Guinang, lumolupyo sa Barangay Visayan Village.
Gisugdan na usab ang pagpaayo ug pagpahawan sa libaong nga dalan sa Purok Santan, Brgy. Bincungan, nga maoy ginaagian sa mga estudyante gikan sa Pipisan Maug National High School ug Bincungan Elementary School. Pila ka tuig na kining problema sa mga opisyales sa barangay tungod kay delikado kini para sa mga estudyante.
"Sa una gyud, lisud gyud ni maagian kay mura man gud ni siya og haunted kay delikado. Maong gihangyo ni ni Kap Eleanor Mendez kay gamit pud ni sa among mga estudyante ug sa katawhan sa Barangay Bincungan aron di na sila mag-agi sa highway, labi na kung maglakaw og gabie. Delikado gyud. Karon, pasalamat mi kay dako na gyud mi og agianan. Salamat Kuya Edwin kay gidungog gyud nimo ang among gihangyo… Daghan kaayong salamat, Kuya Edwin ng masa sa walay kupas nga pagtabang," ingon ni Marivic Yaon, Barangay Kagawad sa Brgy. Bincungan.
Dugay na usab ginaatubang sa mga taga-Purok 3-b, Apokon ang daut nga dalan sa ilang lugar, kung diin aduna na kuno’y mga residente ang nagka-dengue tungod sa gapundo nga tubig kung ting-ulan. Dako ang pagpasalamat nila sa pagpaminaw ni Kuya Gov sa ilang mga mulo.
"Kani among problema diri. Dugay na gyud namo ni gimulo. Naabot na sa time nga nagka-dengue na among anak, halos mga silingan nagka-dengue. So, pasalamat gyud ko sa Oplan KKK ni Gov Edwin Jubahib kay naapil ko atong pulong-pulong, maong napaabot nako ni sa iya ug immediately jud, gihatdan mi diri og graba aron matambakan ni," ingon ni Jonnalyn Amasig, usa ka residente sa Brgy. Apokon.
Problemado usab ang katawhan sa Brgy. La Filipina tungod sa ilang libaong nga dalan, maong gipaabot sa mga opisyales ang ilang pagpasalamat tungod sa paspas nga pagpadala ni Kuya Gov og mga materyales ug ekipo aron masolusyonan ang ilang problema.
"Dako ang among pagpasalamat sa probinsya sa Davao del Norte gipangunahan ni Kuya Gov Edwin Jubahib kay natagad gyud ang among problema. Naabot na ang grader ug dump truck sa Barangay La Filipina… Ang mga mulo sa katawhan sa La Filipina, among nahatag ang serbisyo pinaagi kay Gov Edwin Jubahib," pahayag ni Cyrian Lenueva, usa ka barangay kagawad sa Brgy. La Filipina.
Pipila lamang kini sa mga infrastructure projects nga gihatagan og pagtagad ni Kuya Gov sigon sa mga mulo sa katawhan nga gipadangat kaniya sa pagtuyok sa Oplan KKK sa kabarangayan sa probinsya sa Davao del Norte. #
Writer: Noel Baguio
