Nanguna ang Davao del Norte sa mga local government units (LGUs) sa tibuok Davao Region sa gipahigayon nga Creative Cities and Municipalities Congress, diin ang Cities and Municipalities Competitiveness Index (CMCI) awarding ceremony gipatigayon, didto sa kaulohang Manila niadtong Agosto 23.
Ang Davao del Norte giila ingo’g 3rdMost Competitive Province sa tibuok Pilipinas, base sa 2024 ranking sa CMCI. Ang Rizal Province ang nag-una, gisundan sa Laguna Province sa ika-2 nga pwesto. Si Davao del Norte Governor Edwin I. Jubahib mismo ang nidawat sa tropeyo, kauban ang Head sa Provincial Administrator’s Office – Cooperative and Investment Development Division, Joevynar Miedes.
Sumala sa Provincial Information Communication and Knowledge Management Office (PICKMO), sukad niadtong 2020, ang Davao del Norte kanunayng apil sa top 3 spots sa CMCI ranking. Ang CMCI awarding sa Department of Trade and Industry (DTI) nag-ila sa mga talagsaong kalampusan sa mga LGU sa tibuok nasud, diin ilang gi-highlight ang mga paningkamot sa pagpalambo sa economic dynamism, government efficiency, infrastructure development, resilience, ug innovation.
Sunod sa Davao del Norte, ang Davao del Sur nakasulod sa ika-4 nga pwesto sa Top 10 Philippine Competitiveness Ranking of Provinces. Ilawom sa Highly Urbanized Cities category, ang Davao City, nakasulod sa ika-7 nga pwesto, ug ika-5 kini sa Economic Dynamism; ika-8 sa Government Efficiency; ika-5 sa Infrastructure; ika-7 sa Resiliency; ug ika-8 sa Innovations.
Sa mga component cities, ang Digos City, Davao del Sur, ikaduha sa overall competitiveness ranking, samtang ang Tagum City, Davao del Norte, nakasulod sa ika-10. Nasulod sab ang Tagum sa ika-7 nga pwesto sa Economic Dynamism, samtang ang Digos ug Tagum City ika-5 ug ika-6 sa Government Efficiency. Ika-2 ang Digos sa Infrastructure. Samtang, ang mga siyudad sa Digos ug Panabo nasulod sa ika-3 ug ika-4 sa Resiliency.
Sa mga munisipalidad, ang Pantukan, Davao de Oro, ra ang nag-inusarang nakasulod sa 1st-2nd Class Municipality sa Davao Region sa Top 10 sa overall ranking. Ika-6 kini sa overall ranking ug una sa Innovations, ug ika-7 sa Economic Dynamism.
Writers: Jean Abangan, Jun Rey Villanueva
