Gidalit sa Probinsyal nga Panggamhanan sa Davao del Norte ang pasidungog sa mga empleyadong niretiro human sa duha o tulo kapin nga dekadang pagpanerbisyo sa kapitolyo. Ubos sa pagdumala ni Governor Edwin "Kuya Gov" Jubahib, gihatagan sila og service ring, plaque, ug tokens isip pasalamat ug pahalipay sa ilang sakripisyo, dedikasyon, ug kontribusyon.
Ang mga niretiro mao sila si:
Lilia Edig, 42 ka tuig sa serbisyo
Mildred Funtilon, 33 ka tuig sa serbisyo
Mellani Alinsonorin, 28 ka tuig sa serbisyo
Winona Avenido, 32 ka tuig sa serbisyo
Gil Belenson, 23 ka tuig sa serbisyo
Dionisio Hagonos, 27 ka tuig sa serbisyo
Leo Gemarino, 25 ka tuig sa serbisyo
Eleanor Salva, 41 ka tuig sa serbisyo
Sa napulo ka mga retirees, duha kanila nipanaw na ug miyembro na lamang sa pamilya ang nidawat sa ilang regalo.
Ang mga kanhi trabahante nagagikan sa Provincial Administrator's Office (PADO), Provincial Accountant's Office (PAO), Provincial General Services Office (PGSO), Provincial Information, Communication, Knowledge and Management Office (PICKMO), ug uban pang departamento.
Nidalit usab og mga awit paglingaw ang DavNor Band sa mga honorees.
Gipasabot ni PHRMO Head Edwin Palero nga ang PLGU nag-ila sa katakos sa matag empleyado.
"Ato gyud gi-value ang atoang mga empleyado sa provincial government sa provincial capitol nga sa pagkaagi sa ilang pagsulod dako sila og kontribusyon sa pagserbisyo sa katawhan sa Davao del Norte ug sa ilang paggawas dili nato malimtan ang ilang mga pagkahago, ang ilang mga sakripisyo, ug ang ilang kalipay uban kanato," sulti ni Palero.
Samtang, si Winona Avenido, kanhi Provincial Accountant nga adunay 32 ka tuig sa pagpanerbisyo, naghatag usab og mensahe nga puno sa inspirasyon:
"Kining empleyado ta sa gobyerno, nagaserbisyo ta sa katawhan, katawhan sa Ginoo nga mao pud ang anaa sa iyang mga sugo, nga mao nga nakaingon ko nga bless kaayo ta kay nagtuman ta sa sugo sa Diyos unya gisweldohan pa gyud ta. Mao ni kanunay akong ginahunahuna kada adlaw nga nagatrabaho ko. Nagahatag ni sa akoa og sense of fullfillment," ingon ni Avenido.
Ang Salamat Mabuhay Program: A Tribute to the Retirees, gipahigayon sa Molave Hotel, Hulyo 17, 2024, ug gitambongan sa mga department heads, kaubanan sa trabaho, pamilya, ug mga higala sa mga honorees.
Writer: Lorna Tripoli
