Subling giduso ni Governor Edwin “Kuya Gov” Jubahib ang pagtukod sa mga mega projects ug ang pagdeklara sa Pantaron Mountain Range (PMR) isip protected area, aron mapanalipdan ang mga katawhang Dabaonon sa dagkong kalamidad.
Atol sa gipahigayon nga Regional Earthquake, Flooding and Landslide Dialogue Towards Resilient Dabawenyos sa Bagong Pilipinas, girekomendar ni Kuya Gov ang pag-implementar sa mega projects sama sa dam, mega dikes, flood control projects, ug rehabilitasyon sa mga dagkong suba sa probinsya.
Gihatagan sab og gibug-aton sa gobernador ang kamahinungdanon sa pagdeklara sa PMR aron mahimong protected area ug national park, gumikan sa kaimportansiya niini ingon nga nahibiling kalasangan ug ulohan sa mga dagkong suba sa Davao Region, Northern Mindanao Region, ug sa Caraga Region.
Matud ni Kuya Gov, ang dakong parte sa PMR nga dunay 1,600 hektarya nahimutang sa probinsya sa Davao del Norte ug ang pagkadaut niini maghatag og dakong katalagman sa probinsya.
Dugang hisgot sa gobernador nga ang padayong pagpamutol sa mga kahoy sa PMR miresulta sa dakong pagbaha sa Tagum-Libuganon River Basin ug uban pang dagkong suba nga naghatag sa grabeng kadaut sa agrikultura ug imprastraktura sa lalawigan.
Pananglitan, gibutyag ni Kuya Gov ang katibuk-ang danyos sa sagunson nga dagkong pagbaha sa probinsya nga mokabat ngadto sa kapin P4 billion, tungod sa shearline ug trough sa LPA niadtong Enero ug Pebrero karong tuiga.
Aron mapanalipdan ang PMR, gipakusgan ni Kuya Gov ang kampanya batok illegal logging, diin ang pipila ka mga operasyon nga gipahigayon sa probinsya, kauban ang DENR, PNP, NBI ug uban pang ahensiya, miresulta sa pagkumpiska sa kapin 100,000 ka mga troso ug tablon sa barangay Gupitan, Kapalong, ug sa boundary sa Agusan del Sur.
Gipakusgan sab sa gobernador ang programang Bantay Gubat sa PMR, kung asa gilambigit niya ang mga tribu sa pagpanalipod sa kinaiyahan.
Sulti ni Office of Civil Defense (OCD)-XI Regional Director Ednar Dayanghirang nga gipahigayon ang pinakaunang dayalogo tali sa regional offices sa national government ug mga local government units aron masuta ang saktong mga lakang ug mahatagan og solusyon ang nagkadaiyang problema sa mga LGU sa pagpangandam batok kalamidad.
Miduyog sab sa maong kalihokan sila National Disaster Risk Reduction and Management Council (NDRRMC) Spokesperson Director Edgar Posadas, DILG-XI Director Abdullah V. Matalam, NEDA-XI Director Priscilla Sonido, ug DOST-XI Assistant Regional Director Mirasol Domingo. #
Writer: Noel Baguio
