Gipasabot sa Provincial Human Resource Management Office (PHRMO) ang 71 ka mga bag-ong trabahante sa kapitolyo kabahin sa mga regulasyon, responsibilidad, ug mga maayong pamatasan isip mga empleyado sa gobyerno. Ang oryentasyon gipahigayon niadtong Agosto 13, 2024, sa Basilios By JBites Events Place, Brgy. San Miguel, Tagum City.
Ang mga bag-ong trabahante nga gilangkoban sa mga job order, casual ug plantilyadong mamumuo, nga idestino sa nagkalain-laing departamento sa kapitolyo, gipahinumdoman nga magpakita sa ilang talagsaong dedikasyon aron makatampo sa epektibong paghatud sa serbisyo sibil ubos sa liderato ni Governor Edwin "Kuya Gov" Jubahib.
Sa ilang diskusyon, si Ms. Armelyn Malila, PHRMO Administrative Officer nagpresentar sa Strategic Performance Management System alang sa saktong preparasyon ug pagsumite sa Individual Performance Commitment and Review (IPCR). Lakip usab nga gitudlo sa PHRMO ang mga benepisyo sa suholan ug drug-free workplace.
Ang nasampit nga departamento walay puas sa pagpasabot sa mga bag-ong nadawat nga mga empleyado. Kahibaloan nga niadtong Hulyo, 62 ka mga indibidwal nga nipailalom usab sa susamang oryentasyon.
Writer: Lorna Tripoli
