Isip pagtimaan sa pagsugod sa holiday season, gipasiga sa NCCC Mall of Tagum ang ilahang Christmas lights nga nahimutang sa ika-upat nga andana, niadtong Oktubre 28, 2024. Daghang mga pamilya, higala, ug uban pang mga mallgoers ang midagsa aron masaksihan ang maong mahimayaong kalihokan.
Si Engr. Lenie L. Rabi, manager sa NCCC Mall of Tagum, nagpadayag sa iyang pagpasalamat sa suporta sa komunidad. Nag-awhag kini sa pagsalmot sa komunidad sa nagkadaiyang mga aktibidad nga pagahimoon sa maong establisamento sama sa storytelling, creative workshops, ug festive games.
“This special night, we are excited to launch our series of activities, dubbed as Tale of Christmas Cheer, which we will witness this November 15 until December 24, 2024. This enchanting initiative is design to celebrate the spirit of the season... As we gather to celebrate, let’s come together as a community to share in the warmth of the season,” ingon ni Engr. Rabi.
Si Councilor Ester Angoy, ang nagrepresentar sa City Government of Tagum, nagpadayag sab sa iyang dakong kalipay sa iyang nakita sa gihimong Christmas lighting sa maong mall, nga nagsimbolo sa panaghiusa ug panaghigugmaay sa komunidad. Nagpadangat sab siya sa iyang makanunayong suporta sa mga aktibidad sa maong mall nga naghatag kalipay sa mga residente dili lamang sa Tagum City kalakip sab ang mga kasikbit nga lugar.
“Sa pasko dunay pagtinabangay, dunay panaghiusa, ug labaw sa tanan, sharing gyud ta sa pasko. You share your blessings... Manghinaot kami nga kanang atoang ginapa-portray karon, mabutang gyud na sa atoang kasingkasing, nga taliwala sa mga pagsulay sa unos sa kinabuhi, duna gyud ta’y paabuton nga kaugmaon ug kahayag sa atoang kinabuhi,” sulti ni Councilor Angoy.
Samtang ang lighting ceremony nagpadayon, gilingaw ang mga mallgoers pinaagi sa nagkadaiyang pasundayag nga gidalit sa UMTC Harmonic Chorale uban sa ilang kaugalingong rendition sa mga kanta sa Pasko. Nakadugang sab og kinabuhi ang rondalla performance gikan sa mga estudyante sa Tagum City National Comprehensive High School, ug gipahigayon usab ang dance presentation sa Danza La Filipina ug Seraphic Dancers nga mipahalipay sa tanang nanambong. Nalingaw sab ang mga dumuduong sa pagawas ug pagsayaw ni “Santa”.
Ang mga Christmas decorations nga nagpakita sa usa ka halangdong Christmas tree nga puno sa mga kahayag ug adorno, magpabilin hangtod sa tibuok holiday season. Kini nag-awhag sa mga bisita gikan sa nagkalain-laing dapit aron masinati ang kahimaya sa Pasko sa NCCC Mall of Tagum.
Writer: Nestor Mata, Jr.
