Gihatagan og giya ni Provincial Prosecutor Norman Solis ang mga social workers sa hustong paagi sa pagtabang sa mga biktima sa pagpang-abuso aron masiguro ang tukmang proseso sa pagsang-at og reklamo. Ang maong panudlo gipahigayon atol sa ikatulong quarter nga miting sa Provincial Inter-Agency Committee Against Trafficking and Violence Against Women and their Children (PIACAT-VAWC) niadtong Agosto 12, sa Bulwagan ng Karunungan, Provincial Capitol, Mankilam, Tagum City.
Sa miting, gisaysay ni Solis ang kamahinungdanon sa mga saktong lakang sa mga social workers ug aron dili masayang ilang paningkamot sa pagtabang sa mga biktima. Tinguha sa prosecutor nga adunay saktong direksyon ang matag social workers.
Kahibaloan nga maoy pangayoan og tabang sa mga biktima sa pagpangabuso ang City/Municipal Social Workers.
Sa nasampit nga panagtigom, ang mga social workers matag lokalidad mihatag sa ilang report. Gibutyag nga adunay upat ka kaso sa psychological ug economic abuse sa Talaingod, mga paglapas sa curfew sa Kapalong, tulo ka kaso sa sexual abuse sa Braulio E. Dujali, ug ang viral nga kaso sa robbery with homicide nga naglambigit sa upat ka menor de edad sa Tagum City. Nasayran nga gilahi sila og kahimutangan kung itandi sa mga akusado sa Tagum City Jail.
Gihisgutan usab ang mga lakang sa hustisya ug suporta sa mga biktima pinaagi sa lig-on nga koordinasyon tali sa Philippine National Police, Department of the Interior and Local Government, Provincial Social Welfare and Development Office, ug uban pang ahensya. Gipamatud-an kini sa mensahe ni Vice Governor Clarice Jubahib nga gipaabot ni Executive Assistant IV Chary Jubahib.
“Magtinabangay ta aron palig-onon ang atong mga prevention programs.... Atong sigurohon nga ang hustisya paspas ug patas. Ang mga biktima deserve nila dili lang ang atong kaluoy, deserve nila ang hustisya ug rehabilitasyon ug ang higayon nga ato silang matabangan nga makabangon pag-usab sa ilang mga kinabuhi nga adunay dignidad,” ingon ni Chary Jubahib.
Writer: Lorna TripoliPhotos: Jacque May Lacsama, PICKMO Intern
