Nagpungasi sa kalipay ang mga residente sa Barangay Liboganon, Tagum City human nahatagan og dinalian nga pagtagad ug nagrabahan ang libaong nga mga dalan sa ilang lugar.
Resulta kini sa pakighimamat ni Kuya Gov sa gipahigayon nga Pulong-Pulong sa mga barangay officials, atol sa paglusad sa Oplan KKK (Kaagapay sa Kalinaw ug Kalamboan) sa Barangay Bincungan niadtong Hulyo 23, 2024, diin ilang gipaabot sa gobernador ang ilang mga mulo.
Mapasalamaton ang residente nga si Elizabeth sa pag-rehab sa probinsya, sa pagpangulo ni Kuya Gov, sa dugay na nilang ginaantos nga daut nga dalan tungod sa nahitabong pagbaha sa ilang barangay.
"Nagpasalamat mi nga na-grader na ang among kalsada [diri] kay daghan gyud nangreklamo kay dagha’g libaong. Unya, dagha’g sakyanan nga maapike tungod kay gapangita sila og dalan nga gwapo-gwapo pud maagian. Maong pasalamat mi nga na-okay ang among kalsada… Pasalamat mi kay Kuya Gov Edwin Jubahib sa iyang aksyon nga pagtarong sa among kalsada," ingon ni Elizabeth.
Gisaysay usab sa mga opisyales sa barangay ang ilang hingpit nga pagpasalamat tungod sa sinsero ug walay pili nga pagtabang ni Kuya Gov sa mga nanginahanglan, labi na sa ilang komunidad.
"Katong paghangyo namo kay Kuya Gov, nakita gyud niya ang mga gikinahanglan sa mga tao… Iya gyud gi-obserbaran ug gihatagan og pagtagad tong among mga problema… Maong dako gyud namong pasalamat, isip kami nga naa mi diri sa Purok 6, Liboganon nga dako kaayo ang among heart para kay Kuya Gov," sulti ni Brgy. Kagawad Chosette Manliguez.
"Nakig-meeting mi kay Kuya Gov kauban sa akong mga kaubanan sa barangay unya nasulti namo ang among mga kinahanglan diri, and thankfully, paspas kaayo ang tabang. Karon, nalipay ang tanan… Wala man siya nag-ingon kung unsa ang [political] color nimo. basta ang iya kay matabangan ang nangangailangan," ingon ni Brgy. Kagawad Annalyn Directo.
Lakip usab sa mga proyekto ni Kuya Gov para sa Brgy. Liboganon ang GB sa mga residente, ug pagpatukod og Sea Wall Barrier para sa mga purok nga nahimutang daplin sa dagat.
Sa kasamtangan, padayon ang pag-aksyon sa Probinsyal nga Panggamhanan sa Davao del Norte aron mahatagan og solusyon ang mga hangyo sa matag barangay sa Siyudad sa Tagum. #
Writer: Hannah Zafra
