Nagmalampuson ang gipahigayong Oplan KKK (Kaagapay sa Kalinaw ug Kalamboan) sa Barangay Sto. Niño, New Corella, niadtong Agosto 29, 2024, diin gidala sa probinsya sa Davao del Norte ang mga programa ug serbisyo sa gobyerno duol sa katawhan.
Ang kalihokan gipangulohan mismo ni Governor Edwin "Kuya Gov" Jubahib, nga nipasiugda sa importansya sa kolaborasyon tali sa lokal nga panggamhanan ug mga residente aron masiguro ang kalinaw ug kalamboan sa komunidad.
Gihataga’g gibug-aton ni Kuya Gov ang kamahinungdanon sa pagmintinar sa kalinaw ug ang pagpadayon sa probinsya isip insurgency-free province.
“Ug gani sa atong probinsya, aduna ta’y more or less 5,000 ka surrenderees nga regular NPA ug Militia ng Bayan, kaya na-declare ta nga insurgency-free province. Ug mao na ang atong gipaningkamotan nga ipadayon karon. Mao na ang atong programa atong gibutang gayud ang kalinaw para sa kalamboan, tungod kay ang kalinaw, siya ang susi para sa kalamboan,” ingon ni Gov Jubahib.
Nagpaabot sa iyang pasalamat si Mayor Jorjan "Monet" Federiso kang Gov. Jubahib sa padayong pagsuporta niini sa iyang munisipyo sa New Corella, labi na sa pagdala sa nagkadaiyang serbisyo ngadto sa mga kabarangayan.
“Isip inahan sa atong lungsod, mapasalamaton kaayo ako sa atong amahan sa probinsya Kuya Gov Edwin I. Jubahib, nga maoy rason nganong naa ta dinhi karon. Tungod kay mohatag siya sa iyahang tinud-anay nga serbisyo diin ang makabenepisyo kitang tanang New Corellahanon,” matud ni Mayor Monet.
Kalakip sa mga serbisyo nga gidala sa probinsyal nga panggamhanan mao anglibreng tambal, medical, dental, social, legal, agriculture and veterinary services, eye care screening, HIV screening, X-ray, gupit, livelihood training, pagpanghatag og bugas, tsinelas, abono ug semilya sa mga gulay ug prutas, purga ug multivitamins alang sa mga kahayopan, ug daghan pang uban.
Human sa programa gitapok ni Kuya Gov ang mga opisyales sa lima ka barangay nga mao ang Barangay Sto. Niño, Macgum, Suaon, Cabidianan, ug Limbaan aron paminawon ug mahatagan kasulbaran ang ilang mga panginahanglan.
Kauban sa gobernador ang mga pangulo sa departamento sa kapitolyo. Anaa sab ang presensiya nila Board Member Nickel Suaybaguio, Jr., Board Member Popo Estabillo, Jr., Former Board Member Roger Laguna, Tagum City Councilor Dan Dmitri Sator, ug Councilor Ronald Eliot.
Ang Oplan KKK usa ka inisyatiba sa probinsya nga nagtinguha nga mapaduol ang mga serbisyo sa gobyerno ngadto sa katawhan, labi na sa mga lagyong lugar sa probinsya aron mapalambo ang kalidad sa kinabuhi sa mga residente.
Writer: Nestor Mata, Jr.
