Gibutyag sa mga awtoridad ang ilang hugot nga paningkamot aron masiguro ang malinawon, luwas, ug matinud-anong eleksyon sa Davao del Norte karong umaabot nga Mayo 12, 2025. Lakip sa ilang giandam mao ang sobra 1,800 ka personahe gikan sa kapulisan ug kasundalohan nga ipakatap sa tanang lungsod ug syudad sa lalawigan, ingon man ang pagbantay sa transportasyon sa mga election paraphernalia sama sa Automated Counting Machines (ACM), mga baterya, ug opisyal nga balota.
Kini ang nag-unang tumong sa 3rd Provincial Joint Coordinating Conference (PJCC) nga gipahigayon niadtong Abril 28 sa DavNor Gym, Sports and Tourism Complex sa Tagum City. Gitambongan kini sa mga opisyales sa Philippine National Police, Commission on Elections (Comelec), Armed Forces of the Philippines, F2 Logistics, DepEd, Nordeco, DLPC Inc., mga telecom company, ug mga representante sa European Union Election Observation Mission (EU EOM).
Gisugdan na niadtong Abril 29 ang paghatod sa mga ACM gikan sa Davao City padulong sa nagkalain-laing LGUs sa Davao del Norte. Giklaro ni F2 Logistics Regional Coordinator Russel Agullon nga karong Mayo 2 pa ipahigayon ang pagdala sa mga opisyal nga balota gikan mismo sa shipping line direkta ngadto sa buhatan sa Provincial Treasurer. Human niini, pagabahinon kini uban sa mga deputized agencies ug siguridad, ug dalhon sa mas gagmay nga mga sakyanan paingon sa municipal treasurers.
“The route plan of the official ballot is, this will not be dropped-off point to the hub. So, instead from shipping line it will directly transferred to the provinces. 'Yong dropped-off niya is to the Provincial Treasurer. From the Provincial Treasurer, doon na namin siya i-segregate with the security personnel and another deputized agencies. Then, i-transfer namin sa mga malilit na truck, then, directly delivered to the municipal treasurer,” saysay ni Agullon.
Sa laing bahin, giingon ni PLt. Veronica Quibel sa Davao del Norte Provincial Police Office nga upat ka convoy team ang ilang giandam aron mag-escort sa ACMs ug mga balota. “We will be having four teams from PNP mag-conduct ng convoy para sa security ng ACM from Tibungco, Davao City going to different cities and municipalities of Davao del Norte,” matud ni Quibel.
Gipasiugda usab sa mga delegado sa PJCC nga padayon ang ilang kooperasyon aron masiguro nga walay hulga sa kalinaw ug seguridad sa adlaw sa piniliay. Giila ang aktibong partisipasyon sa mga security forces ug logistics partners isip yawe sa kasaligan nga eleksyon.
Sumala sa mga representante sa EU EOM, ilang giobserbahan ang tanang lakang nga gihimo sa lokal nga mga ahensya—gikan sa pagpangandam sa katawhan, pag-apod sa kagamitan, hangtod sa deployment sa mga personnel—aron masuta nga transparent ug credible ang proseso sa eleksyon.
Gipangulohan sa miting nila PNP Provincial Director PCOL Alexander Serrano Jr. ug COMELEC Provincial Election Supervisor Atty. Norliza Mamukid, kinsa misiguro nga andam ang tanang sektor sa pagsuporta sa eleksyon, uban sa tinguha nga maprotektahan ang katungod sa katawhan ug malikayan ang panagbingkil.
Writer: Lorna Tripoli
