Pagkadungog sa batingaw, nikalit og kamingaw ang palibot, ug diha-diha dayon paspas ug hapsay nga nanggawas ang gigrupo nga mga estudyante sa eskwelahan paingon sa luwas nga lugar. Ang tanan, nag-obserbar sa duck, cover, and hold. Aduna puy scenario sa sunog nga daling napalong sa usa ka personahe uban sa tabang sa mga bombero.
Sa laing scenario, dunay estudyante, ug maestra ang natanggong sa 3rdfloor nga bahin sa usa ka building ug walay laing paagi nga makalingkawas sanglit naalihan sa dakong kalayo ang mga agianan kundi ang pag-ambak gikan sa habog nga building. Uban sa tabang sa PDRRMO, abtik nga na-rescue ang mga stranded gamit ang ilang kahanas sa hi-angle rescue ug ang inflatable rescue air cushion.
Mao kini ang mga kabahin sa earthquake and fire drill nga gihimo sa Tagum City National Comprehensive High School (TCNCHS) isip opisyal nga kickoff program sa National Disaster Resilience Month (NDRM) 2025 sa DepEd Tagum City Division.
Matud ni Dionisio B. Siglos, Principal sa TCNCHS, nga ang ilang eskwelahan padayon nga nagapangandam matag semana pinaagi sa regular nga drills. “Dili nato malikayan ang kalamidad, mao nga kinahanglan andam ang tanang estudyante ug faculty. Atong tuyo nga masanay ang tanan sa hulga sa katalagman aron dili malisang inig tinuod na ang hitabo,” matud niya.
Gisaysay usab ni Siglos ang aktuwal nga 6.9 nga linog niadtong katapusang semana sa Hunyo diin naaplikar nila ang paspas ug hapsay nga pagresponde, usa ka pruweba nga epektibo ang ilang preparasyon. Dugang pa niya nga ginatudloan usab sa Provincial Disaster Risk Reduction and Management Office ang ilang mga magtutudlo sa paagi sa pag-rescue ug pag-atiman sa mga casualty, ug pirme silang ginamonitor sa probinsya alang sa mga pinakabag-ong protocol.
Samtang si Marjun T. Dawal, Project Development Officer sa Tagum City Division, nipasalig nga andam ang tanang eskwelahan sa siyudad. “Gi-train na ang tanang DRRM coordinators ug school heads. 100% prepared na ang atong mga eskwelahan. Gusto namo nga mahimong disaster-resilient ang mga bata sa tanang panahon,” sulti niya.
Ang TCNCHS ang napiling eskwelahan alang sa kickoff event tungod sa ilang paningkamot nga mabalik ang ilang titulo sa Gawad Kalasag. Sa tuig 2023, nadaog niini ang pinakataas nga posisyon, apan sa miaging tuig, nakalanding na lang sa ikaduhang pwesto. Karon, ilang target ang pag-angkon pag-usab sa best DRR prepared school sa tibuok Pilipinas.
Si Eric Rosillo sa PDRRMO nagkanayon nga aktibo ang papel sa probinsyal nga panggamhanan sa pagsiguro nga disaster-ready ang mga estudyante. “Gikan sa hangle rescue hangtod sa pag-showcase sa mga skills sa mga estudyante ug response teams, tanang lakang gibuhat para ipakita nga andam ang DavNor… Dako kaayo’g tsansa nga mabalik sa Compre ang Gawad Kalasag champion title,” ingon ni Rosillo.
Gipakita usab sa drill ang inter-agency cooperation, nga adunay synchronized nga lihok sa PDRRMO, BFP, kapulisan, ug uban pang ahensya sa probinsya. Ang aktibidad usa ka ehemplo sa gisang-at nga polisiya ni Governor Edwin “Kuya Gov” Jubahib nga"zero casualty"sa panahon sa kalamidad. Gipaniguro sab sa PLGU nga aduna dayo’y mga ayuda, pagkaon, ug support services sa mga maapektuhan.
Writer: Jun Rey Villanueva
