Gatosan ka mga parolado ug mga empleyado sa kapitolyo ang ni-avail sa libreng medical and dental services nga gihatag sa probinsyal nga panggamhanan pinaagi sa PADAC-LAPDA medical outreach activity sa pakig-alayon sa Provincial Health Office ug Davao Province Parole and Probation Office No. 1 and 2 sa DavNor Gym, DNSTC, Mankilam, Tagum City, niadtong Hulyo 15, 2024.
Sumala ni Jucelyn C. Lumangtad, ang PADAC Focal Person, nga gikinahanglan ang maong aktibidad para masiguro ang maayong panglawas sa mga parolado aron sa kanunay makasunod sila sa pagtambong sa mga aktibidad kabahin sa ilang pagka-parolado.
“Kini nga maong kalihokan nga naglantaw ta nga ang mga moments, mga higayon nga dili ta katambong sa mga activities nato, panawagan sa programa sa atong reformation tungod kay naa tay laing gibati. So, hopefully ma-reduce ang atong absenteeism o mapalta sa pagtambong sa mga kalihokan tungod nianang mga hinungdan sa dili maayong pamati sa panglawas. Hinaut nga makatabang ni nga mga kalihokan sa medical ug dental nga gipahigayon karon para ma-perfect nato ang atong participation. Ma-perfect nato atong attendance diha sa programa nato sa reformatory sa atoang parole and probation ug dinha sa atong balay silangan puhon,” sumala ni Lumangtad.
Nipaabot sa iyang pagpasalamat sa probinsyal nga panggamahan si Probation Officer I Jelian A. Pellazar gumikan sa gihatag nga kahigayonan nga mamahimong kabahin sa programa sa PADAC ang ilang buhatan.
“We express our sincere gratitude sa Provincial Anti-Drug Abuse Council especially to the PADAC Chairperson Governor Edwin Jubahib and to the PADAC Secretariat Ma’am Rosalinda Rapista and to the PADAC Focal Person Ma’am Jucelyn Lumangtad. So, thank you for inviting us, for considering us na i-part mi dinhi sa inyohang program nga inyohang gi-initiate,” ingon ni Pellazar.
Sa maong adlaw, lakip sa serbisyong gidalit ang Human Immunodeficiency Virus o HIV Testing.
Nahimong malampuson ang aktibidad gumikan sa kooperasyon sa mga doktor sa probinsya nga gilangkoban nila ni Dr. Josephine Pareñas, Dr. Zaida Adlaon, Dr. Kristine Nicole Hortel ug Dr. Julius Ceasar Nambong. Inubanan sa presensiya nila PSWDO Head Rosalinda Rapista ug PSWDO Assistant PG Head Jeffrey Calamongay.
Writer: Nestor Mata, Jr.
