Malampusong gipahigayon ang turnover ceremony alang sa Pabahay sa Tribu sa Sitio Mesolong, Barangay Sto. Niño, Talaingod, kaniadtong Disyembre 12, 2024. Ang maong programa mipahimulos sa 22 ka mga pamilya nga nakadawat og bag-ong balay, nga adunay kinatibuk-ang kantidad nga sais (6) milyones ka pesos.
Si Executive Assistant III Jemuel Melmida mipadayag sa mensahe ni Governor Edwin "Kuya Gov" Jubahib atol sa seremonya. Gipasiugda ni Melmida ang pagpadayon sa suporta sa gobernador alang sa mga Indigenous People (IP) aron mapalambo ang ilang kalidad sa panginabuhi.
“Atong gipahigayon karon turnover sa mga Pabahay sa atong 22 ka mga beneficiary. Nanghinaut si Kuya Gov nga atoang pagaampingan gyud ang mga balay nga gihatag kay tungod wala gyud nagpabaya ang gobyerno sa paghatag og tubag sa mga panginahanglan ninyo nga mga katawhan dili lang dinhi sa lungsod sa Talaingod kondili sa kinatibuk-an sa probinsya sa Davao del Norte,” sulti ni Melmida.
Nagpaabot sa iyang pasalamat si Barangay Konsehal Dante Sibugay sa Barangay Sto. Niño sa Probinsyal nga Panggamhanan sa Davao del Norte nga gidumalahan ni Kuya Gov alang sa paghatag og mga proyekto nga direktang nakatabang sa mga lumad sa ilang barangay.
“Sukad sa paglingkod sa atoang gobernador nakita niya og unsa ang atoang panginahanglan dinhi sa atoang Sitio Mesolong. Mao nang gitagaan ta og prayoridad. Gitagaan ta’g pabahay dinhi aron aduna tay komportable nga tulganan, kay sa unang panahon matulog ta, inig ulan molingkod ta, kay matuloan ta,” ingon ni Sibugay.
Atol sa maong kalihokan, mitunol ang Provincial Social Welfare and Development Office sa mokabat 140 ka mga food packs nga dunay sulod lima (5) ka kilong bugas, tulo (3) ka sardinas, usa (1) ka corned beef, ug beef loaf ngadto sa mga residente sa maong dapit. Midalit sab ang mga personahe sa probinsyal kapitol og nagkadaiyang parlor games nga nakahatag kalingawan ug nakapahugyaw sa mga tribu.
Ang mga balay nga gihatag pinasubay sa programang gitukod aron masiguro nga adunay hapsay ug luwas nga puloy-anan ang mga benepisyaryo.
Writer: Nestor Mata, Jr.
