Gilusad sa Department of Social Welfare and Development (DSWD) XI Provincial Field Office - Davao del Norte ang “e-PANALO ang Kinabukasan” caravan sa Sabangan Multi-Purpose Gym, San Isidro, nga naglangkob sa pagpauswag sa digital financial literacy alang sa mga benepisyaryo sa Pantawid Pamilyang Pilipino Program (4Ps), labi na sa mga lagyong lugar.
Pinaagi sa programa, pwede nang makapili ang mga 4Ps beneficiaries sa kapartner stakeholders sa DSWD nga mga e-wallet services sama sa GCash ug Maya o kaha mag-abli og PISO Plus Account sa Landbank of the Philippines aron maoy sudlan sa ilang cash grants.
“Actually, mao na ni siya ang direction sa program. One is digitalization gyud. Kasi mas cost-effective man kung digital. Dili na kinahanglan og daghan pang papel and all kay naa na tay providers and partners… Ikaduha, kung ma-maximize ni beneficiary ang use sa iyang cash grant, gusto man gud nato nga kung unsa ang panginahanglan ni beneficiary, dali na lang na niya ma-access kung naa siyay digital wallet… And ang padulong gyud is ang self-sufficiency. Kabalo na siya mo-handle sa iyang kwarta. Magkat-on siya kung unsaon paggamit sa digital nga pamaagi,” sumala ni Honey Jay D. Bacus, Social Officer III sa DSWD XI Provincial Field Office-Davao del Norte.
Anaa pud sa caravan ang mga stakeholders sama sa GCash, Maya ug landbank aron mo-assist sa registration process kauban usab ang BPI Foundation ug Ayala Foundation aron mohatag financial education kanila.
Kabahin sa lektura sa mga beneficiaries ang sakto nga pagdumala ug paggasto sa ilang panalapi labi na ang pag-save, mao nang nag-offer ang Landbank sa ilang bag-o nga product nga Landbank PISO Plus nga pwede nila gamiton aron makatigom.
“Ang purpose man gud sa atong DSWD nga dili lang gyud sila magpabilin nga beneficiary. Kinahanglan gyud sila nga mo-transcend nga maasenso ilang kinabuhi. Tapos ihatag na pud sa lain nga katong mga nagkalisud. So, in the future, maka-save gyud sila kay kung makagradweyt na ilang mga anak nga ginasuportahan sa 4Ps nga ayuda, pwede na gyud sila nga maka-save,” ingon ni Marlyn Cudal, ang Manager sa Landbank Tagum Main Branch.
Gawas sa savings, pwede pung gamiton ang PISO account nga pambayad sa ilang bills online pinaagi sa landbank mobile banking app.
Sa mga gakalisud sa pagsabot ug paggamit sa mga digital platforms, gipasalig sa landbank ug mga stakeholders nga welcome ang mga beneficiaries sa pag-adto sa ilang mga opisina aron matudloan. Sulti usab ni Bacus nga gawas sa caravan, nakaapil na ni nga pagpanudlo sa ilang Family Development Session.
“Sa atong Family Development Session i-discuss pud gyud ang e-Panalo sa mga beneficiaries. So, i-saturate gyud nato tanan Pantawid beneficiaries nga makabalo on e-Panalo ang Kinabukasan,” matud ni Bacus.
Kahinumdoman nga nahimong suhistyon ang paggamit sa digital platforms alang sa pag-distribute sa mga payout aron malikayan ang mga scam. Butyag ni Bacus nga lahi ang pamaagi sa maong programa ug layo sa mga anomalya.
“Si Pantawid Program kasi captured na kasi among beneficiaries. So, identified na among beneficiaries. Grants na ni nila, mao na gyud ni ilang madawat. So, gina-audit na gyud ni siya permanente,” ingon ni Bacus.
Usa sa mga gikabalak-an sa mga benepisyaryo nga mawala ang ilang kwarta kung ipaagi sa mga digital wallets. Gipatin-awan kini ni Bacus ug gipasalig nga secured ang platform.
“Kanya-kanya man nga mga digital wallets naa siyay iyang privacy nga mga settings and mechanisms. So, dili naman sila under sa DSWD, so they have to ensure sa ila nga services nga naa gyud tong security and privacy sa data sa atong beneficiaries. Anyway, mag-create man pud gud sila’g account using their own IDs. Si service provider na ang mo-take care sa ingon ana nga hisgutaan,” sigon niya.
Ang usa ka 4Ps benepisyaryo nga si Margie Cortez, taga-Prk. 4, Sabangan, nagsasay nga mogasto pa’g P300 back and forth pamasahe palugsong sa Tagum aron lang mo-withdraw sa iyang cash grant. Nakita niya karon nga mas bintaha ang paggamit og Gcash ug mapasalamaton kini nga niabot na gyud ni nga oportunidad.
“Sa GCash sir, dali ra gyud siya ang proseso… Mas masayon og kung sa GCash na lang,” sumala ni Cortez.
Pwede gihapon magpadayon sa paggamit ang mga benepisyaryo sa ilang cash card. Option lang nila kung gusto nila mogamit sa mga digital platforms. Bisan pa’g wala na ginagamit ang ilang cash card, dili pud ni ma-expire.
Dugang usab ni Bacus nga pwede pung mobalik sa cash card kung mausab ang hunahuna sa beneficiary apan kinahanglan silang mopahibalo sa DSWD kay moagi pa’g proseso ang pagbalhin sa payroll.
Naka-schedule nang adtoan ang tanang siyudad ug lungsod sa probinsya. Sunod nga bisitaan sa e-Panalo ang Kinabukasan caravan ang Panabo City, New Corella, B.E. Dujali, ug IGACOS.
Writer: Jun Rey Villanueva
