Nidawat sa kantidad ₱4,810 ang 956 ka benepisyaryong Tagumeños ubos sa programang Tulong Panghanapbuhay sa Ating Disadvantaged/Displaced Workers (TUPAD) sa Department of Labor and Employment. Ang pay-out nga gidumala sa mga personahe sa DOLE gihimo sa DavNor Gym, Nobyembre 23, 2024 nga gitambongan nila Governor Edwin I. Jubahib, mga Board Members sama nila Nicandro Suaybaguio Jr., BM Prospero "Popo" Estabillo Jr., pipila ka mga miyembro sa konseho sa Tagum, ug uban pa.

Serbisyong patas walay kaltas, mao ni ang gibarogan ni Governor Jubahib ngadto sa mga benepisyaryo uban sa pagsiguro nga madawat nila ang saktong kantidad agi'g tabang pinansyal. Giawhag sa gobernador nga gamiton sa tamang paingnan ang maong salapi, uban sa pagkanayon nga padayon pa ang pagtunol og hinabang labi na sa mga wala pa gyud nakadawat.

Buot ni Gov Jubahib nga tanang nanginahanglang katawhan sa probinsya hatagan og oportunidad nga makadawat sa susamang ayuda. Gihangyo usab niya ang mga benepisyaryo sa nasangpit nga ayuda nga tarungon sa paggamit ang maong salapi.

"Manghinaot ko nga ang cash nga inyong madawat karon nagkantidad ₱4,810 gikan sa Department of Labor and Employment, inyo ‘ning magamit para sa inyong pamilya," matud ni Gov Jubahib.

Samtang, dili usab katuo nga nadawat na niya ang ayuda human sa profilling, si Efren Cabongbong usa ka driver sa motorsiklong pasaheroan, nagpasalamat sa iyang nadawat.

"Unexpected ba nga makadawat ka o dili. Dako akong pasalamat sa tanan diri nga nagpapay-out, ilabi na kay Kuya Gov," sulti ni Cabongbong.

Usa usab ka benepisyaryo sa TUPAD nga si Emiliana Manuel, residente sa Barangay San Miguel, nagsulti sa PTV News Team nga ang iyang nadawat nga hinabang pinansyal para sa iyang personal nga panginahanglan ug sa iyang mga apo.

"Para sa akong kaugalingon ug sa akong mga apo," ingon ni Manuel.

Writer: Lorna Tripoli