Mokabat sa 35 ka eskwelahan sa tibuok Davao del Norte ang nisalmot sa tulo ka oras nga poster-making contest isip kabahin sa selebrasyon sa National Disaster Resilience Month karong Hulyo 2025.
Gipasiugdahan sa Probinsyal nga Panggamnahan sa Davao del Norte, pinaagi sa Provincial Disaster Risk Reduction and Management Office (PDRRMO) ubos sa pagdumala ni Governor Edwin I. Jubahib, ang maong kompetisyon nga naghiusa sa mga elementarya ug high school students gikan sa mga DepEd divisions sa Panabo City, Island Garden City of Samal, Tagum City, ug Davao del Norte.
Gipahigayon ang kalihokan sa VIP Clubhouse, DNSTC, Mankilam, Tagum City, diin ang mga kabataan naghulagway sa ilang mga ideya sa kaluwasan ug kaandam panahon sa kalamidad pinaagi sa makalingaw ug educational nga mga poster.
Gipasabot ni PDRRM Officer Glenda Delideli nga ang tumong sa indigay mao ang pagpahibalo sa mga kabatan-onan sa importansya sa kaandam ug kahibalo sa panahon sa katalagman sama sa linog, baha, ug uban pang kalamidad.
“Wala ta kabalo kung kanu-a o asa mahitabo ang katalagman. Importante nga ang mga kabataanandam, kahibalo sa angay buhaton, ug mahimong tulay sa ilang pamilya panahon sa emerhensiya,” matod pa ni Delideli sa pakighinabi sa PTV DavNor 48 News Coverage Team.
Sa gihulagway sa mga posters adunay mga color coding sa mapa, timaan sa kalawmon sa tubig baha. Lakip sa entry ang mga kamot nga naghawiray agi’g mensahe sa pagtinabangay panahon sa emerhensiya, ug daghan pang mga senaryo.
Dugang pa ni Delideli nga pinaagi sa art competition, mas mapasundayag sa kabataan ang ilang pagsabot sa National Disaster Resilience Month ug mas mapalapad ang ilang papel sa pagpangandam ug pagtubag sa katalagman.
“Sa ilang mga drawing, makita nato unsa ilang pagsabot sa NDRM. Ug tungod niini, naapil nato ang kabatan-onan nga aktibong kabahin sa pagsangkap sa komunidad batok sa mga kalamidad labi na sa ilang mga pamilya,” ingon pa niya.
Ang awarding ceremony ipahigayon sa katapusan sa bulan sa Hulyo aron pormal nga tapuson ang selebrasyon sa NDRM 2025.
Writer: Lorna Tripoli
