Nitunol og pinansyal nga tabang ang Provincial Government sa Davao del Norte, pinaagi sa Emergency Shelter Assistance (ESA) program, ngadto sa 17 ka pamilya nga nabiktima sa sunog. Ang maong programa gitumong aron matabangan ang mga apektadong pamilya nga makabawi ug matukod pag-usab ang ilang pinuy-anan.
Ang Provincial Social Welfare and Development Office (PSWDO) ug Provincial Governor’s Office (PGO), pinaagi ni Mabelle Ann Bellina, personal nga mitunol sa ayuda. Ang mga pamilya nga nawagtangan og tibuok balay nakadawat og ₱10,000 matag usa, samtang ang adunay partially damaged nga balay nakadawat og ₱5,000.
Sa mensahe nga gipaabot ni Gobernador Edwin I. Jubahib, dili man dako ang hinabang apan makatabang kini sa mga biktima samtang hinay-hinay silang mobangon gikan sa ilang kahimtang.
Usa ka padre de pamilya nga si Ramil Tagupa, usa sa mga nasunogan nga residente sa Barangay San Miguel, Tagum City, nagpadayag sa iyang pasalamat sa gobernador. “Dako kaayo’g tabang kanamo gyud, kami nga isip nahitaboan. Nagpasalamat ko’g dako ni Kuya Gov kay nagpadayon ang iyang tabang sa mga katawhan,” matud niya.
Padayon nga nagahatag og ayuda ang ESA program sa mga biktima sa nagkalain-laing kalamidad, natural man o tungod sa tawhanong kahimoan, isip kabahin sa padayong paningkamot sa probinsya nga matabangan ang mga apektadong pamilya.
Writer: Lorna Tripoli
