Gipahigayon ang pinakaunang Multi-Sectoral Committee Meeting karong tuiga ubos sa liderato ni Governor Edwin I. Jubahib, nga nagtutok sa paghatag og solusyon sa mga panginahanglan sa katawhan sa Davao del Norte. Ang mga prayoridad alang sa 2025 naglakip sa maayong panglawas, agrikultura, imprastruktura, ug ekonomiya.
Sumala ni Acting Provincial Planning and Development Coordinator Engr. Maria Hazel Zafra, ang mga mapanday nga plano ipasulod sa Local Development Investment Program (LDIP) alang sa tuig 2025-2028.
“First time ni nga atong gitapok ang tanan nga committees so that mamahimo na gyud siya nga functional. Kini nga mga committees under ‘ni sa Provincial Development Council. Sayod man ‘ta nga naa ta’y council headed by our Provincial Governor… So karon, gi-activate nato ni karon. Nagsugod ta because we are into crafting the Provincial Development Investment Program. So, sayod man ta nga ang PDIP nato, a three-year plan, so gisugdan nato ni’g sayo kay para mo-come up gyud ‘ta og kadtong mga projects nga mo-address, responsive sa needs sa atoang communities,” matud ni Engr. Zafra.
Ang target alang sa 2025 naglakip sa:
- Pagkunhod sa maternal mortality ug morbidity rate,
- 50% nga pagkunhod sa malnutrition,
- 30% nga pagmenus sa housing backlog,
- 90% sa mga marginalized ug vulnerable nga sektor maka-access sa mga programa sa sosyal nga kaayohan,
- rehabilitasyon sa mga pasilidad sa Davao del Norte Hospital Carmen Zone, ug
- pagtukod sa Barangay Health Center Phase II sa Barangay San Miguel, Tagum City.
Atol sa maong tigom, gi-propose ang dugang pondo ilalom sa supplemental annual investment plan 2025.
Kini nga kalihokan gihimo sa Bulwagan ng Karunungan, Capitol Compound, Mankilam, Tagum City, kaniadtong Enero 22, sa pagpanguna sa Provincial Development Council.
Writer: Lorna Tripoli
