Gipalapdan ni Ellen Diniay, usa ka residente sa Barangay Magatos, Asuncion, Davao del Norte ang iyang gulayan gikan sa 100 ngadto sa 1,000 square meters sukad sa 2020, tungod sa tabang nga iyang nadawat pinaagi sa KAAGAPAY (Kawsa sa Agrikultura ug Panginabuhian sa Barangay) program ni Governor Edwin I. Jubahib.

Sa pagdawat sa libreng semilya ug abono sa KAAGAPAY, nakahukom si Diniay nga palapdan ang iyang gulayan nga sumala niya, pinakbet-type nga naglakip sa paliya, okra, batong, ug kalabasa. Ang iyang gulayan nahimong tinubdan og dugang kita alang sa iyang pamilya, diin siya mokita og ₱2,000 matag semana kung mahal ang palit sa gulay, ug di momenus sa ₱1,000 kung tingbarato. Kini dako nga tabang sa ilang panimalay, ilabi na kay ang sweldo sa iyang bana tag-kinsenas lamang.

Dugang pa niya, dako usab ang tabang sa DavNor Buying Back Team sa ilang pagpanguma. Sumala kang Diniay, nakapamenus kuno kini sa ilang gasto sa transportasyon tungod kay ang team mismo ang mopalit sa ilang mga produkto, labi na sa panahon nga adunay bagsak presyo sa merkado.

“Daghan kaayong salamat sa imong programa nga KAAGAPAY. Dako kaayo’g tabang para sa amoa mga gagmayng mag-uuma nga maka-extra income ‘mi ta’s makabenepisyo pud mi sa amoang gipangtanom, ”matud ni Diniay.

Ang KAAGAPAY program gimugna niadtong 2020 taliwala sa pandemya aron mapalig-on ang seguridad sa pagkaon ug kapanginabuhian sa mga taga-Davao del Norte. Hangtod karon, nagpadayon ang programa sa paghatag og ayuda sa mga mag-uuma, naghatag kanila og mga oportunidad ug suporta aron mapaayo ang ilang produksyon ug panginabuhian.

Pinaagi sa KAAGAPAY, nagpadayon ang paningkamot sa probinsya nga mapalambo ang sektor sa agrikultura ug masiguro nga walay magutom sa Davao del Norte.

Writer: Lorna Tripoli