Nanawagan ang Philippine Statistics Authority (PSA) ug Department of Social Welfare and Development (DSWD) sa tanang miyembro sa Pantawid Pamilyang Pilipino Program (4Ps) nga wala pa nakaparehistro ug nakapa-authenticate sa ilang national ID nga magparehistro na. Apil sa kampanya ang mga bata nga edad 0-5 anyos, isip kabahin sa Family Development Sessions (FDS) Equivalency alang sa Pebrero ug Marso ning tuiga.
Sa programa sa PTV DavNor 48 nga Kasamtangang Katikaran sa Kalamboan (KKK) niadtong Enero 27, nga gidumalahan ni Provincial Information Officer Dr. Mervin Jay Suaybaguio, gipahibalo nila Diana Mejorada sa DSWD, Michelle Mamingo ug Ronald Victor Membreve sa PSA, nga kinahanglan ang national ID aron mas mapadali ang mga social services ug mga transaksyon sa gobyerno.
Ang tanan nga miyembro sa 4Ps, kinahanglan moagi sa PhilSys registration ug authentication. Kini isip FDS equivalency sa nasampit nga duha ka bulan aron makadawat sa cash grant.
“Gi-require ang tanang 4Ps beneficiary nga magpa-register sa atong Philippine Indentification System... Ang equivalency nato sa FDS is amounting to ₱750 per month. So, kung magparehistro moatomatik February and March compliant na. So, naa na moy automatic ₱1,500,”sulti ni Diana Mejorada, FDS Specialist/DSWD 4Ps Focal.
Sa Davao del Norte, 111,153 ka 4Ps household members ang wala pa nakaparehistro. Gipadayag ni Michelle Mamingo nga padayon nga ginabuhat ang mobile registration ngadto sa mga baryo matag Lunes.
“So far ang ating registration naman maganda and very active pud ang participation sa atong local government unit pinaagi sa atong mga local civil registrar. Ug ang atong mga barangay officials in the conduct of our mobile registration ginatabangan nila ang Philippine Statistics Authority nga ma-saturate ang matag barangay labi na kadtong mga vulnerable sector ug underserved nato nga mga constituents para marehistro during mobile registration,”ingon ni Michelle Mamingo, OIC/Supervising Statistical Specialist, PSA.
“Ginaawhag namo ang 4Ps benefeciaries dili lang sa Davao del Norte but tibuok Davao Region po nga kita maningkamot. If wala pa nakaparehistro, magparehistro na ta ug magpa-authenticate sa atong mga PhilSys site,”matud ni Mejorada.
Ang registration ug authentication para sa national ID dili lamang para sa mga 4Ps apan kini gitumong para sa publiko aron makakuha og valid ug unified nga ID.
Writer: Lorna Tripoli
