Dili kliyente ang tan-aw ni Governor Edwin “Kuya Gov” Jubahib sa katawhang Dabaonon, kundili sila ang labing maayo nga partner sa gobyerno sa pagpatunhay sa kalinaw ug pagkab-ot sa tinuod nga kalamboan.
“Kamo ang best partner sa atong gobyerno… walay gobyerno kung walay katawhan. So, kinahanglan motabang jud mo sa atong gobyerno para moasenso ang pamuyo sa matag-usa,” sulti sa gobernador, atol sa ika-upat nga hugna sa Oplan KKK (Kaagapay sa Kalinaw ug Kalamboan) serbisyo caravan sa Barangay Magdum, Tagum City.
Kahinumdoman nga sugod sa iyang paglingkod isip gobernador, gipabati ni Kuya Gov nga ang katawhan gayud ang sentro sa paghatag sa mga nag-unang serbisyo sa probinsyal nga panggamhanan, labi na ngadto sa mga naglisod ug nanginahanglan.
Gani, iyang ginganlan ang katawhan nga maoy tinuod nga agalon sa mga elected officials ug alagad sa publiko, ug angayan lamang nga ihatag sa katawhan ang labing maayo nga serbisyo.
Liboan gihapon ang nakapahimulos sa maong Oplan KKK serbisyo caravan sa Kapitolyo nga mihatud sa daghang serbisyo sa tugkaran sa mga barangay sa Magdum, New Balamban ug Pandapan.
Lakip sa mga serbisyo ang libreng medical consultation, dental services, eye screening, x-ray, agriculture and veterinary services, tambag legal, libreng gupit, livelihood training, paghatag bugas, tsinelas, school bags, semilya sa prutas ug gulay, fertilizer, ug daghan pang uban.
Gitubag dayon ug gihataga’g solusyon ni Kuya Gov ang mga problema nga gipaabot sa mga barangay officials sa gipahigayon nga Oplan KKK Pulong-Pulong sa Barangay.
Lakip sa iyang gipaniguro nga ipatuman ang mga proyekto sa farm-to-market road, road gravelling, tribal hall, purok center ug overpass.
Writer: Noel Baguio
