Mihatag sa iyang taho si Governor Edwin “Kuya Gov” Jubahib sa daghang mga kalampusan sa duha ka termino sa iyang administrasyon, atol sa iyang 5th Ulat Sa Bayan kagahapong adlawa, Hulyo 1, 2025.
Sa iyang Ulat, isip gipatigbaw nga okasyon sa selebrasyon sa 58th Araw ng Davao del Norte, gisaysay ni Kuya Gov ang dakong kadaugan sa mga reporma ug programa nga iyang gipatuman sulod sa unom ka tuig sa pagkab-ot sa inklusibo nga kalamboan.
Lakip niini ang kadaugan nga nahimong “Insurgency-Free Province” ang Davao del Norte sa tuig 2022, nga dakong tabang aron mabubo ang P11.5 billion ka mga preskong investments sa probinsiya.
Kapin 120,000 ka mga pasyente ang nakapahimulos sa Zero-Billing Program ug dul-an sa 50,000 ka mga pamilya ang nakabenepisyo sa health services, samtang labaw sa P500 million ang nahatag nga nagkalainlaing social services assistance.
Labaw sa 50,000 ka mga pamilya usab ang nahatagan og dugang panginabuhian ilawom sa flaghip DavNor KAAGAPAY Program, samtang gikab-ot ang kasigurohan sa pagkaon.
Gipatuman pud ni Kuya Gov ang labaw sa 2,000 ka mga imprastruktura sa tibuok probinsya nga mukabat sa kapin P7 Billion. Lakip niini ang pagtukod sa kapin 600 ka mga pabalay sa tribo, sa tabang sa nasyonal nga panggamhanan ug ang Oplan Canal project aron pagkunhod sa mga pagbaha sa probinsiya.
Dunay 683,979 assorted forest and fruit tree seedlings ang natanum sa 2,409 ka hektarya nga kayutaan nga nakabenepisyo sa 5,047 ka mga mag-uuma ug landowners.
Gipakusog sab ni Kuya Gov ang pagpakaylap sa mahinungdanong impormasyon ngadto sa katawhan, pinaagi sa PTV-DavNor Channel 48, DXNR Radio 911, One DavNor Newsletter, ug One DavNor Network ug PTV DavNor 48 Facebook pages.
Natala sa probinsya ang lowest poverty incidence sa tibuok Davao Region ug naangkon sa pila ka higayon ang pinakaprestihiyosong pasidungog nga Seal of Good Local Governance sa tuig 2019, 2022, 2023 ug 2024. Inila ‘sab ang Davao del Norte isip Most Sustainable and Liveable Province sa tuig 2022, 2023 ug 2024.
Nadawat sab ni Kuya Gov ang Grand Slam Governor of the Year Awardee tungod sa sunod-sunod nga maong award gikan 2022 hangtod 2024, ang 2023 Outstanding Provincial Governor for Mindanao Island, ug ang 2025 National Outstanding Governor.
Kini ug daghan pang mga kalampusan gitanyag ni Kuya Gov sa mga katawhang Dabaonon, nga maoy inspirasyon sa iyang kakugi ug pagpaningkamot.
“Kining tanan… atong gitanyag sa atong katawhang Dabaonon, nga maoy atong inspirasyon sa tanan natong kakugi ug pagpaningkamot,” sulti niya.
Timaan sa pagpasiugda niini sa inklusibong panag-ingnan sa kalihokan, ang Ulat ni Kuya Gov gitambongan sa mga opisyales sa national government agencies, local government units, mga executives ug empleyado sa Kapitolyo, mga representante sa private sector, academe, religious sector, non-government organizations, ug uban pang mga sector.
Writer: Noel Baguio
