Puno sa enerhiya ang mga magtutungha sa Alternative Learning System (ALS) gikan sa upat ka divisions sa Department of Education nga nagsangka alang sa Province-wide Als-lympics 2024, nga gipahigayon sa DavNor Sports and Tourism Complex niadtong Hulyo 11 hangtod 12.

Ang mga divisions gikan sa Tagum City, Panabo City, Island Garden City of Samal, ug Davao del Norte Division. Gipangulohan kini sa Provincial Sports Youth Development Office (PSYDO) sa pakig-alayon sa Department of Education.

Gibutyag ni Jay Michael Fernandez, Youth Development Officer III sa PSYDO, nga malipayon sila sa padayon nga pagpaluyo ni Governor Edwin "Kuya Gov" Jubahib sa nasangpit nga kompetisyon sukad tuig 2019.

"Kini nga event mao ang Als-lympics 2024. Ikatulo na ni nga hugna sukad nga nasugdan ni kaniadtong 2019. So, malipayon kami nga gipadayon gayud kini ni Kuya Gov Edwin I. Jubahib. Gani, nag-celebrate na ta sa ikatulo nga hugna sa Als-lympics 2024," matud ni Fernandez.

Ang duha ka adlaw nga aktibidad naglangkob sa zumba competition, Ginoo at Binibini Als-lympics, vocal duet contest, spoken word poetry, ug mga sangka sa basketball, volleyball ug uban pang dula.

Sa mensahe ni Governor Edwin "Kuya Gov" Jubahib nga gipaabot pinaagi sa iyang representante, nagdasig kini sa mga kabataan nga mapadayonong molambigit sa natad sa pagpaugnat sa kusog ug determinadong mohuman sa pagtungha. Ang Als-lympics nagbitbit sa temang, “Kalaro kita, hindi kalaban”.

"Kadula dili kalaban. So, nindot kaayo ang tema. Ang ilang pag-anhi dinhi wala sila nakigsangka sa ilang kalaban kondili nakigdula sila sa ilang mga kauban,” dugang ni Fernandez.

Writer: Maria Lorna Tripoli