Gipasidunggan ni Governor Edwin I. Jubahib ang napulo ka mga miyembro sa Philippine National Police (PNP) atol sa ika-6 nga PRRRT! STOP awarding ceremony nga gipahigayon sa New Marangal Hall, DNPPO National Highway, Tagum City, Septyembre 16, 2024. Ang seremonya nag-ila sa talagsaong kontribusyon sa mga kapulisan sa pagpadayon sa kahapsay ug kalinaw sa probinsya.

Ang mga awardees nakadawat og plaque of appreciation, token, ug cash incentive isip pahalipay sa ilang dedikasyon. Lakip sa mga gipasidunggan mao sila:

Best Police Commissioned Officer Category:

1st Place          PLtCol Jay Dema-ala

2nd Place        PLtCol Jun Bautista 

3rd Place         PLt.Col Jeffrey Latayada

4th Place         LtCol Maycelle Cabibil

Best Non-Commissioned Officer Category:

1st Place          PSSg Sheena Andamon

2nd Place        PSMS Rodolfo Gomez Jr.

3rd Place         PSSg Tenny Noel Pineda Kong

4th Place         PSSg Kerk Niel Ibag

5th Place         PSSg Leetel Lyn Walawala

Rookie of the year – Patrolman Melbourne Brisbane

Best Marksmanship for PCO – PCpt. Crisanto Quibar

Best Police Station – Tagum City Police Station

Best Marksmanship for PNCO – PCpt. Vaness Joy Vallejos

Gidayeg ni PNP XI Regional Director Nicolas Torre III, nga girepresentahan ni PBGen Dionisio Bartolome, Jr., ang inisyatiba sa PLGU Davao del Norte ug ang advisory group sa paghatag og suporta sa mga kapulisan. Iyang gipasabot nga ang mga awardees gipili tungod sa ilang extraordinary performance sa pagpakgang sa kriminalidad.

"Sa pamamagitan ng inisyatibong programa at magandang gawain ng PNP PRO XI, lalo na ang mga kapulisan dito ng Davao del Norte na suportado ng very generous na at very supportive na local government, and of course, the advisory group na nag-spearhead talaga nito, nawa ay hindi kayo magsawa sa pagbibigay ng parangal sa kanila nang sa gayon mas mahigitan pa nila ang ginagawa nila sa probinsya ninyo," sigon ni PBGen Bartolome.

Mismong si Gov. Jubahib niila sa katakos sa kapulisan sa ilang paningkamot batok ilegal nga droga, sugal, ug uban pang mga kalapasan.

"Nakita nato nga despite sa daghan og problema nga giatubang ang atong mga kapulisan sa Davao del Norte, pero naningkamot gyud sila nga himoon nila ang tanan nga maserbisyohan nila ug maprotektahan ang mga katawhan sa probinsya sa Davao del Norte," sulti ni Gov. Jubahib.

Iya usab gihangyo ang mga pulis nga ipadayon ang ilang maayong trabaho ug paningkamot aron mas mahatagan og serbisyo ang katawhan.

"Hangyo nako sa inyoha nga ipadayon ninyo ang mga maayo ninyong mga performance ug himoon pa nato nga mas doblehon ang atong mga pagpaningkamot para mas maalagaran nato ang katawhan sa Davao del Norte," dugang sa gobernador.

Samtang, taliwala sa mga negatibong impresyon batok sa PNP, si STOP awardee PSSg Sheena Andamon nihatag og pasalig nga magpadayon ang ilang dedikasyon sa pagpanerbisyo ug pagprotekta sa katawhan. Iya usab gipasalamatan ang mga stakeholders nga naghatag og suporta sa ilang mga programa.

"Ihatag lang nato ang atoang mga best kutob sa makaya nato sa pagpanerbisyo," matud ni Andamon.

Nitambong usab sa seremonya DNPPO Provincial Director PCol Alexander Serrano, Jr., Rev. Dr. Edwin Santos, ang mga pamilya sa mga awardees, ug mga pribadong stakeholders.

Writer: Lorna Tripoli