Mitunol og hinabang ni Governor Edwin "Kuya Gov" Jubahib sa 136 ka pamilya nga biktima sa baha tungod sa pag-overflow sa dike sa Barangay Magdum, Tagum City, nga gipahiluna sa evacuation center sa Col. Rosalio Saludares Elementary School. Kauban niya ang Provincial Social Welfare and Development Office (PSWDO) ug Provincial Disaster Risk Reduction and Management Office (PDRRMO) sa pag-apod-apod og pamahaw, tubig, tag-5 kilo nga bugas, ug hygiene kits. Nagtunol usab og hot meals sayo sa buntag ang taga-PSWDO kauban si Board Member Nicandro Suaybaguio Jr. ngadto sa mga evacuees.

"Naghatag dayon ‘ta og kining hot meals ug pamahaw. Gihatod nato karong buntaga mga alas-7 ug naghatag pud ‘ta og family food packs para sa atoang mga internally displaced persons," ingon ni Rapista.

Nakigpulong si Kuya Gov sa ilang punong barangay ug uban pang opisyales kabahin sa relocation plan alang sa mga pamilya nga nagpuyo duol sa dike. Ang kalit nga pagsaka sa tubig sa dike tungod sa pagbundak sa ulan dala sa Intertropical Convergence Zone (ITCZ) maoy hinungdan sa pagbaha sa lugar. Sumala sa gobernador nga duha ka ektarya ang gikinahanglan alang sa kabalhinan sa mga apektadong pamilya. Ang pondo sa pagpalit og luna pagakuhaon gikan sa probinsya. Elevated ug dunay Purok Center maoy tinguha sa gobernador alang sa ilang kabalhinan.

"Kada tuig namo maigo sa baha diha. Siguro, mangita na ta’g area para sa relocation sa inyoha," sulti sa gobernador.

Samtang, Si Angieliza Olmilla, biktima usab sa baha, nagpasalamat sa tabang sa probinsya sa pagpanguna ni Gov. Jubahib. Siya usab nagsaysay sa PTV News Team kalabot sa kusog nga pagdahuros sa tubig-baha.

"First time gyod nahitabo ang tubig niabot gyod sa amoang taas, taas naman gyud to amoang balay nisaka pa gyud ug nisulod sa tindahan, mao tong nakuyawan nami, nanggawas nami," matud ni Olmilla.

Kauban sa gobernador sa relief operation sila Board Member Nicandro Suaybaguio, Jr., BM Prospero Estabillo, Jr., ug pipila ka konsehal sa siyudad sa Tagum.

Writer: Lorna Tripoli