Aprubado na sa Provincial Development Council (PDC) sa Davao del Norte ang Provincial Development Investment Program (PDIP) alang sa tuig 2026 hangtod 2028, ug ang Annual Investment Program (AIP) para sa 2025 atol sa ilang miting niadtong Hunyo 25, 2025, sa Pavilion, Davao del Norte Sports and Tourism Complex, Mankilam, Tagum City.
Gipangulohan ang miting ni Gobernador Edwin I. Jubahib isip PDC Chairman, kauban si Provincial Planning and Development Coordinator Maria Hazel Zafra, ug mga planning officers, LGU representatives, NGOs, pribadong sektor, ug uban pang mga stakeholders.
Giklaro sa miting nga ang PDIP magahatag og direksyon sa paggahin sa pondo para sa general public services, social services, ug ekonomikanhong programa, nga nakaangkla sa development agenda sa kasamtangang administrasyon nga “KUYA GOB NG MASA.”
Sa tulo ka tuig nga plano,kapin ₱3.78 bilyon ang total nga gigahin sa lokal nga panggamhanan — ₱1.19 bilyon sa 2026, ₱1.25 bilyon sa 2027, ug ₱1.32 bilyon sa 2028 — aron pondohan ang mga prayoridad nga proyekto sa tibuok probinsya.
Gisuportahan usab sa konseho ang Supplemental Annual Investment Program (SAIP) No. 3 para sa 2025, isip dugang lakang sa pagpalig-on sa mga kalamboan nga gikatakda na sa AIP.
Sa maong okasyon, gibutyag ni Gov. Jubahib ang padayon nga pagpasiugda sa KAAGAPAY (Kawsa sa Agrikultura ug Panginabuhian sa Barangay) — ang flagship program sa gobernador, nga nagtinguha sa pagpalig-on sa seguridad sa pagkaon ug panginabuhian sa mga kabarangayan.
Gisuportahan usab niya ang sugyot sa mga banana exporters nga ang probinsya angay nang magtukod og kaugalingong agricultural diagnostic laboratory, aron dili na kinahanglang magpadala sa mga sample ngadto sa gawas sa rehiyon o nasud, sama sa Vietnam.
“Kini gyud unta akong gusto buhaton sa akong ikaduhang termino,” matod sa gobernador. “Bisan ang blood samples sa atong free-range chicken program moabot pa sa Maynila. Kinahanglan nato og laboratory nga atong kaugalingon para sa mga pananom ug kahayopan.”
Ang mga plano ug inisyatiba nga giendorso sa PDC nagtimaan sa padayong paningkamot sa probinsyal nga panggamhanan sa pagpalambo sa kinabuhi sa mga Dabaonon pinaagi sa hapsay, epektibo, ug inklusibong pagplano sa kalamboan.
Writer: Lorna Tripoli
