Sa iyang tinguha nga molambo ang kahimtang sa kinabuhi sa matag pamilyang Dabaonon, plano ni Governor Edwin “Kuya Gov” Jubahib nga iapil sa iyang flagship DavNor KAAGAPAY Program ang tanang pamilya nga below minimum wage earners.
“Kung pwede sugod karong tuig ang tanang below minimum wage (earners) matag bulan mahimo natong miyembro sa atong KAAGAPAY program,” pamahayag sa gobernador, atol sa June Convocation Program sa Kapitolyo.
Subay sa Wage Order No. RB XI-23, sugod Marso 7, 2025 ang minimum nga sweldo sa trabahante sa Davao Region ₱510 kada adlaw para sa non-agriculture workers ug ₱505 kada adlaw para sa agriculture workers.
Sulti ni Kuya Gov nga ang unang katuyoan sa programang KAAGAPAY (Kawsa sa Agrikultura ug Panginabuhian sa Barangay), mao ang pagtabang sa mga pamilya nga gagmay o walay kita, labi na ang mga kaigsoonang tribu.
“Kay ang purpose nato sa KAAGAPAY mao man ang paghatag og tabang sa matag pamilya nga nagadawat og salary nga below sa minimum. Labi na usab ang atong kaigsoonang IPs nga atong matabangan para nga maka-stand sila. Dili magsige’g salig, nga magsige’g pangayo sa gobyerno kundili tabangan para nga makabarog nga mo-income sila sa ilang sariling pagpaningkamot,” ingon sa gobernador.
Kahinumdoman nga gilusad ni Kuya Gov ang DavNor KAAGAPAY program (Kawsa sa Agrikultura ug Panginabuhian sa Barangay) niadtong tuig 2020, aron makab-ot ang kasigurohan sa pagkaon, mohatag panginabuhian sa katawhan, ug batokan ang climate change.
Gikan sa paghimugso sa programa, kapin 17,000 na ka mga vegetable farmer-beneficiaries ang miani og dul-an 7,000 ka metrico tonelada sa klase-klaseng gulay. Duna na puy 127,468 ka mga manok ug 6,500 ka mga breeder chicken ang na-disperse ngadto sa 753 ka mga People’s Organizations.
Sa kinatibuk-an, kapin 22,000 na ka mga pamilya ang nakabenipisyo sa programa, nga wala na nagproblema sa pagbaligya sa ilang mga gulay ug mga manok sanglit ang probinsya na ang mipalit sa ilang mga produkto.
Dul-an 4,000 gihapon ka mga benepisyaryo ang nakadawat sa 591,410 fruit and forest tree seedlings, ug dunay 1,408 ka recipients sa KAAGAPAY inland fishery production ang mi-produce sa 21.91 metric tons sa tilapia, hito ug karpa. Samtang kapin 130 ka tonelada sa mais ang naani sa kapin 50 ka benepisaryo sa KAAGAPAY Corn.
Nasakmit sa KAAGAPAY Program ang 2022 NEDA Sustainable Development Goal (SDG) Champion Award tungod sa dakong tabang niini aron molambo ang kinabuhi sa mga mag-uuma, mga IPs, mga kabataan, ug uban pang mga marginalized sectors.
Writer: Noel Baguio
