Gidalit sa Department of Labor and Employment Region XI – Davao del Norte Field Office, ang serbisyo caravan alang sa mga estudyante nga nipailalom sa Government Internship Program (GIP) atol sa culmination program niini, niadtong Nobyembre 19, 2024. Gipahigayon kini sa DavNor Gym, Sports and Tourism Complex, Mankilam, Tagum City.
Ang mga ahensya nga nitunol sa ilang serbisyo mao ang Technical Education and Skills Development Authority (TESDA), National Bureau of Investigation (NBI), Career Development Support Services, Professional Regulation Commission (PRC), Social Security System (SSS), Philhealth, ug mga private stakeholders.
Gipasundayag ang mga success stories sa mga interns nga naglakip sa ilang pagpanarbaho sa nagkadaiyang buhatan sa gobyerno, ug pakiglambigit sa kalihokan sa komunidad sama sa pagpananom og mga kahoy alang sa kinaiyahan ug uban pang aktibidad.
Si DOLE XI Davao del Norte Field Office Head Erlinda Mamitag, nag-awhag sa mga GIP interns nga hatagan nila’g importansya ang pagpanerbisyo ug mamahimong inspirasyon sa pagpangempleyo.
"You are not just interns, you are the future leaders, innovators and change makers of our society. Remember the skills you have gained and the connections you have made during this program, are stepping stones to your bright futures," sulti ni Mamitag.
Mapasalamaton si Mamitag sa probinsyal nga panggamhanan ubos sa pagdumala ni Governor Edwin I. Jubahib ug sa uban pang mga partner agencies nga misuporta sa mga GIP interns.
"I want to extend my deepest gratitude to the national government agencies, the LGUs and to all partner agencies who have supported our interns throughout the journey," dugang niya.
Ang DOLE-DNFO nanguna sa pagtunol sa mga sertipiko sa mga GIPs nga nagpamatuod sa pagtapos sa ilang internship gikan tulo ngadto sa unom ka bulan nga pagpanarbaho.
Samtang, si Ivan Lupiba, ang resource speaker sa GIP enhancement training, nipasabot bahin sa "Healthy Minds, Healthy Workplace".
Gihuman ang programa pinaagi sa pag-anunsyo sa mga nidaog sa online quiz nga gipartisiparan sa mga GIP interns.
Writer: Lorna Tripoli
