Gisaulog ang Culmination Program sa Elderly Filipino Week niadtong Oktubre 18, 2024 sa DavNor Gym, DNSTC, Mankilam, Tagum City, uban ang tema nga "Senior Citizens - Building the Nations, Inspiring Generations." Ang kalihokan gimugna aron paghatag og pasidungog sa mga senior citizens ug pagpadayag sa ilang dakong kontribusyon sa komunidad.
Sa mensahe ni Provincial Social Welfare and Development Officer Rosalinda Rapista, iyang giila ang papel sa mga senior citizens isip mga haligi sa katilingban nga padayong nag-amuma sa mga kabatan-onan ug naghatag og inspirasyon sa umalabot nga mga henerasyon.
“Naa ta diri makigdula, makighimamat para pag-ilaila sa inyohang mga kauban, kay ugma damlag, asa ta mangadto naa ta’y mailhan, inig adto nato sa mga LGU sa Davao del Norte. Ug karong adlawa, inyoha ning adlaw. So, ang provincial government pinaagi kang Kuya Gov naggahin og pondo, para niining activities nato karon and naa ta’y mga prices and surprises karong adlawa,” sumala ni Rapista.
Nagpakita usab ang mga senior citizens sa ilang talento sa nagkalain-laing sociocultural activities, sama sa Curacha, group dance, ug song solo competition, nga gipahigayon atol sa maong kalihokan. Apil niini ang mga sports activities sama sa chess, dama, ug dart, diin nagpakita og abilidad ang mga senior participants. Ang Panabo City ang nakakuha’g daghang kadaugan ug gideklarar nga overall champion sa kompetisyon.
Dugang pa, gipahigayon usab ang medical activities alang sa mga senior citizens, sama sa libreng eye check-up, x-ray, medical check-up, pag-distribute sa mga bitamina ug maintenance medicine, ug tooth extraction, nga dako kaayong tabang alang sa mga senior citizens nga nanginahanglan og medical services.
Atol sa kalihokan mitambong sab sila Former Administrator Engr. Josie Jean Rabanoz ug Clarice Jubahib, nga maoy mga bisita sa programa.
Writer: Nestor Mata, Jr.
