Gisaulog ang ika-36 National Disaster Resilience Month 2024 sa Davao del Norte nga adunay temang "Bantayog ng Katatagan at ang Pagbubuklod sa layuning kahandaan" nga gipangunahan sa Provincial Disaster Risk Reduction and Management Office (PDRRMO). Gisugdan kini pinaagi sa usa ka motorcade ug programa nga gipahigayon sa DavNor Gym, DNSTC, Mankilam, Tagum City, niadtong Hulyo 9, 2024.
Gitambongan ang kalihokan sa mga representante gikan sa 11 ka mga lokalidad sa probinsya, kauban ang local DRRMO, ang Provincial Alliance of DRRM Officers, Philippine Coast Guard Davao del Norte, DNPPO, kasundalohan sa 1001st ug 1003rd Brigade Philippine Army, ug ubang mga ahensya sa panggamhanan ug pribadong sektor.
Sa maong kalihokan, nagpaabot si Governor Edwin "Kuya Gov" I. Jubahib, nga bag-ohay lang nakalingkod balik sa iyang pwesto human ang sumada 90-day suspension, sa iyang mainitong mensahe sa pagpalig-on ug pagdasig, labi na sa mga rescuers nga nagserbisyo alang sa tanang matang sa katalagman, pinaagi ni Provincial Administrator Josie Jean Rabanoz.
"Sa panahon sa kalamidad anaa gyud kanunay ang pagtinabangay dinhi sa atoang probinsya. Wala tay gipili sa pagtabang. We always set aside our differences especially political colors, kay ang atong tumong anaa gyud kanunay sa pagtabang. Maong wala gyud ta natay-og sa bisan unsang kalamidad nga atong nasinati sa probinsya. Anaa na dinha ang covid-19 nga nihatod nato og dakong kahadlok. Ang grabeng pagbaha tungod sa shearline ug through sa low pressure area ug bisan pa ang mga man-made disasters. Nagpabilin tang lig-on ug andam sa tanang panahon nga mohatag sa bisan unsang klaseng tabang aron maluwas ang katawhan panahon sa kalamidad ug katalagman," ingon ni PA Rabanoz.
Si Glenda Delideli, ang OIC-PG-Dept. Head sa PDRRMO nagkanayon nga giila sa probinsya ang buhis-buhay nga gihimo sa mga rescuers, ingon man ang mga volunteers sa rescue operation sa kalamidad dala sa shearline ug through sa low pressure area (LPA) sa probinsya ug ang pagtabang sa pag-rescue sa mga biktima sa landslide sa Davao de Oro. Sila gikatakdang modawat og plaque of recognition.
"Ma-uplift ang ilang mga moral isip mga buhis-buhay kung atong tan-awon ang trabaho. Ang uban niani nila is mga volunteers nga gusto lang gyud motabang panahon nga adunay calamity. Gusto lang gyud pud nato ipakita ang atoang pag-ila sa ilang kontribusyon kay dako pud kaayo ang ilang ikatampo to assure, to ensure the safety sa mga Dabaonon," sulti ni Delideli.
Highlight sa maong okasyon ang nagpadayong mga contest alang sa Recycle, Upcycle and Repurpose, On the Sport Poster Making Contest nga partisiparan sa tanang buhatan sa probinsya, ug uban pang aktibidad nga tapuson sa Hulyo 31.
Writer: Maria Lorna Tripoli
